MASIPHAKAMISE IZINYAWO NGEZINGUQUKO KWEZOMNOTHO
ULAKA nokuphelelwa yisineke kwabantu abasha nabantu abamnyama jikelele ngokunyonyoba kwezinhlelo zokulethwa kwezinguquko kwezomnotho kulelizwe lonkana, nakwazulu-natal ikakhulukazi, kufanele sikuqonde njengenye yezinto okufanele siyinhlangano ephethe lelizwe nelawula uhulumeni sizisukumele kungakapholi maseko. Udaba lokuphuthunyiswa kwezinguquko ezinqala kwezomnotho, iradical Economic Transformation (RET) olusematheni kulezi zinsuku, empeleni lunomlando omude lumunyungwa ezinhlakeni nasezigcawini ezehlukene zeAfrican National Congress (ANC). Lokhu kungenxa yokwamukela ukuthi loluhlelo luyisikhali esisemqoka ekuhlangabezaneni nenselelo yobubha, ukweswelakala kwemisebenzi nokungalingani kwethu kwezomnotho njengezakhamuzi zaseningizimu Afrika. Izingqungquthela ezehlukene ze-african National Congress sezakubeka kwacaca ukuthi sidinga ukuphakamisa izinyawo ngaloludaba.
Ingqinamba enkulu-ke esibhekene nayo ngeyokungaphenduleki kwabaningi ngendlela egculisayo embuzweni wokuthi kudalwa yini ukuba kuthathe isikhathi eside kangaka ukuba kubonakale izinguquko ezibambekayo emuva kweminyaka engaphezulu kuka 23 siphethe. Empeleni kuningi okubambekayo osekufezekile kulomshikashika wezinguquko ezinqala kwezomnotho kodwa loluhlelo lokuphuthunyiswa kwezinguquko ezinqala kwezomnotho kufanele siluqonde njengomzamo wokuqhubeka nokulungisa amaphutha enqubo yobandlululo anomlando omude. Luyindlela yokwakha isizwe esingcono kunaleso esihaqwe ngukwentula imisebenzi, ububha nokungalingani kwabantu abakhele izwe lethu. Umbuzo omkhulu ngowokuthi yiyiphi indlela engcono yokulungisa iphutha lokuba kube yiningi labantu baseningizimu Afrika okungabamnyama okuhleli emahlombe abo lomthwalo wengcindezelo yeminyakanyaka? Sikhuluma nje izikhundla eziphezulu zabaqondisi abaphethe amabhodi ezinkampani ziqhoqhobelwe ngabamhlophe abagweve nengxenye engu 68.5% yazo. Uquqaba lwabamnyama abangabomdabu luphethe kuphela ingxenye engu 14.4%, kuthi amandiya aphathe 8.9%, kuvale amakhaladi ngo 4.9%. Abokufika abasezikhundleni eziphezulu balinganiselwa ku 3.4%.
Kungakho-ke sithi kuyaphuthuma ukuba kungene uhlelo lwezinguquko kwezomnotho ukulungisa isimo esinje ekuvulekeni kwamathuba okulawula iminxa eyehlukene ebalulekile ezweni ngoba izinto zitshekile impela okwamanje. Abamhlophe abaningi kangaka abalawulayo ezikhundleni eziphezulu empeleni baningi ngokuphindwe kasithupha kunesibalo sabakubo ababambe iqhaza ekukhandweni komnotho wezwe lethu. Ngamanye amazwi, indlu emnyama ngobuningi bayo isebenza kanzima ukukhiqiza umnotho olawulwa yidlanzana labamhlophe. Yikho nje eningizimu Afrika ingxenye eyiphesenti elilodwa qhwaba ilawula ingxenye engu 42% yomnotho wonke wezwe.
Umzamo wokuqondisa amaphutha esawashiyelwa wubandlululo ubhekene kakhulu nanokubuyisa isithunzi namalungelo abantu ababecindezelwe. Lamalungelo aqukethwe esahlukweni sesibili somthetho-sisekelo amayelana namalungelo kwezempilo, umpheme phezu kwekhanda osezingeni elifanele kanjalo nokufumana umsebenzi. Sikhuluma lapha ngamanzi nenhlanzeko nokuhlinzekwa ngezidingo zezenhlalakahle kulabo abadinga ukuxhaswa.
Ngaloluhlelo lwezinguquko ezinqala kwezemnotho senabela nasemikhakheni eyehlukene yezokulawula izwe, okubalwa kukho imigomo ephusile nokushaywa kwemithetho ezokwazi ukuletha izimpendulo kulesi simo esiguquguqukayo kwezenhlalo nomnotho.
Ezingxenyeni ezehlukene zesifundazwe sakwazulu-natal sekuvamisile ukuba kuphazanyiswe ukusebenza kwezinkontileka ezisuke zithole amathenda emisebenzi emikhulu. Kwesinye isikhathi lokhu kuhambisana nokwesabisa ngodlame, kanti sikhuluma nje lolodaba seluze lwafinyelela kaningana ezinkantolo ezehlukene.
Mhlawumbe yizigameko ezinje ezinganika abanye umqondo wokuthi uma sikhuluma ngokuphuthunyiswa kwezinguquko ezinqala kwezomnotho sisho umbhidlango ongahlelekile nocekela phansi umnotho. Abanye mhlawumbe bafikelwa wumqondo wokuthi sifuna kube kwampunzíedlíemini, lapho noma ngubani ezitapela lapho ethanda khona.
Kakukhona lokho okuhlosiwe. Okuqondiwe wukuba kube nendlela ehleleke kahle, necace bha yomgudu okuhanjwa ngawo wokulethwa kwezinguquko ukuze ukwabiwa komnotho kubhekele ubulili nobuzwe kwabawulawulayo. Zona izinguquko ezinqala ziyadingeka kungakapholiswa maseko. Kodwa ngeke uhulumeni avuke kusasa adle ngejozi noma yimuphi umhlaba noma izimayini ngaphandle kwesinxephezelo esifanele nokulandela imithetho yezwe nomthetho-sisekelo. Phela siqhuba ngohlelo lwezomnotho oluxubile, okusho ukuthi miningi iminxa ebambisene ekwakheni nasekuphatheni umnotho walelizwe. Ngeke silibale futhi ukuthi njengezwe iningizimu Afrika ivulelekile ukuhweba namanye amazwe ngokuwathengisela esikukhiqizayo kanti nathi kunezimpahla eziningi esizidinga kuwo. Noma kunjalo, silokhu sizibophezele ukuqikelela ukuthi kuzo zonke izinqumo esizithathayo, sibhekelele ukulungisa isimo sezinselelo ezintathu esibhekene nazo, ukwesweleka kwemisebenzi, ububha nokungalingani kwezomnotho. Kungalesi sizathu futhi sithi udaba lokubuyiselwa komhlaba kubantu luyaphuthuma ngakho malwenzeke ngesivinini esikhulu ngaphansi kwezimiso zomthetho-sisekelo wezwe ngokuxoxa nabaholi bendabuko, abasingethe intuthuko yezindawo zasemakhaya nalabo abaphethe izinkampani ezishaya amaphiko kwezemihlaba nezakhiwo. Kufanele kwakhiwe ibhange labamnyama elizobasiza bakwazi ukuthenga amasheya bakhe izimboni babe ngosomabhizinisi abasezingeni eliphakeme nabo. Izinkampani ezinkulu ezisingethe izimali, njengamabhange, silindele ukuba nazo zisondele zikhombe elazo iqhaza kulezi zinguquko ezinqala okufanele ziphuthunyiswe kwezomnotho.