Uzoganwa yisithembu okhulele kusona
USALOBIZELA ezinye izicoco zomhlaba u-innocent “Tycoon” Mantengu ohambela phezulu ngemuva kokubuya nesicoco se-international Boxing Federation (IFB) All Africa Junior Featherweight ehlula usiphosethu Mvula e-eastern Cape muva nje. Umantengu ubedlala ibhola kodwa walishiya ngemuva kokungenwa wuthando lwesibhakela.
Ungene esibhakeleni esikhokhelayo ngowezi-2009 wahlulwa nguthami Mntambo emlazi. Ngemuva kwalokhu unqobe izimpi eziyisi-6 zilandelana kwaze kwaba uhlulwa ngutoto Helebe ngowezi-2013. Unezimpi ezili-15 kanti usahlulwe kwezine kuphela. Ungaphansi kwe-ethekwini Boxing Gym kanti ulolongwa nguZwi Magudulela bese izimpi zakhe zihlelwa yiludonga Boxing Promotions kathulani “Nkunzi” Magudulela onguyise kazwi.
Ukleliswe endaweni yokuqala kwabagaqele isicoco sakuleli kanti usendaweni yesi-6 kwi-ibf e-afrika okumsondeza eduze nokulwela ibhande elikhulu LE-IBF. Umantengu uzinze ekhula Village, edukuduku, emtubatuba ogwini olusenyakatho-mpumalanga yeKwazulu-natal, kanti uyise uhlala ophondweni khona emtubatuba. Ingxoxo kamantengu NELANGA Langesonto ngempilo yakhe yangaphandle kwenkundla ihambe kanje:-
ILANGA Langesonto: Ukhulele ekhaya elinjani?
Mantengu: Ngikhulele ekhaya elifudumele kakhulu ngoba ubaba ubesebenza kanzima esikhulisa. Phela le ndoda engizalayo inamakhosikazi amathathu. Kukhona umankosi ozala mina, umadube abahlala egcekeni elilodwa ophondweni nomangwane ohlala enkunduse. Ubaba unenqwaba yezingane njengoba sesisonke sili18.
Abanye ngize ngibakhohlwe amagama ngendlela esibaningi ngakhona. Kukhona ucelimpilo, uzanele, uphumzile, ustaff, uncamsile, uhalalisani, yimina, umbali, uzethu, ungcebo, unqobile, ukhayelihle ulondiwe nabanye abaningi.
ILANGA Langesonto: Akukuhlukumezanga nje ukukhulela esithenjini?
Mantengu: Ngiyaye ngizwe kuthiwa kuba nezinkinga esithenjini. Thina ekhaya sikhuliswe kahle kakhulu. Umuntu ulala futhi udla kunoma yikumuphi umama.
ILANGA Langesonto: Uyakucabanga ukuthatha isithembu?
Mantengu: Kudala ngasithatha isinqumo sokusithatha. Umazulu waseshowe engihlekisana naye ngamtshela efika nje empilweni yami ukuthi uzolanywa. Isithembu yinto yasekhaya njengoba iningi lobaba bethu beganwe ngamakhosikazi amaningi.
ILANGA Langesonto: Usukulungele ukunakekela isithembu njengoba isimo somnotho singamile kahle eningizimu Afrika?
Mantengu: Ngilala ngabo-00h00 zonke izinsuku ngenxa yokusebenza kanzima. Ekuseni ngiya ejimini bese kuthi emini ngiye emsebenzini kwac4 Chartered Accountant bese kuthi ntambama ngiyofunda e-unisa.
ILANGA Langesonto: Wenza ziphi izifundo e-unisa.
Mantengu: Ngenza IPGCE ngoba ngifuna ukufundisa. Ngiphothule ifinancial Management EDUT ngowezi-2013.
ILANGA Langesonto: Ukusheba kanjani ukufunda nesibhakela?
Mantengu: Ngiyakwazi ukuhlela isikhathi. Sengikujwayele ukuthi kumele ngilale phakathi nobusuku ngenxa yesikole nesibhakela.
ILANGA Langesonto: Ukhona omunye umdlalo owukhonzile ngaphandle kwesibhakela?
Mantengu: Mina bengidlala ibhola ngasekhaya. Inkinga wukuthi izinkundla ebesidlala kuzona ziwubhuqu. Bengishaywa njalo ekhaya ngoba bengibuya ngingcolile. Isibhakela ngisiqale ngowezi-2001 ngisisheba nebhola. Ngibe sengigxila esibhakeleni ngoba kujinyelwa endaweni enompheme futhi ubaba ubengithengela zonke izidingo zalo mdlalo.
ILANGA Langesonto: Yikuphi osukwenzile ngemali yesibhakela?
Mantengu: Sengithenge umhlaba ngakha umuzi. Ngiwakhele ubaba kodwa ugadwa yimina. Nginezinkomo nezimbuzi emakhaya. Ngifuna ukuzandisa nje manje. Imfuyo igadwa ngubaba.
ILANGA Langesonto: Uzwakala uyindoda eyithandayo impilo yasemakhaya.
Mantengu: Ngiyithanda kakhulu. Mina ngikhule ngazi ukulusa nokulima njengoba besibophela izinkomo silime ngazo. Mina ngize ngamdala ngingayazi ukuthi ibiza malini impuphu. Ekhaya ummbila besiwuthatha uyogaywa ube yimpuphu ebibizwa ngomanswinya. Ukulima nje kuyinto engingeke ngihlukane nayo. Ngihlela ukuvula isitolo esithengisa izithelo. Inkinga nje ngisatshiswa yisomiso esingapheli.
ILANGA Langesonto: Ubukukhonzile ukuzingela usemncane?
Mantengu: Ekhaya kazifuyiwe izinja ngoba sikhonza Kwashe- mbe. Bengizingela uma ngikomalume ngoba beziziningi izinja khona.
ILANGA Langesonto: Usunazo izingane?
Mantengu: Nginezimbili okwamanje. Ziyeza kodwa nezinye. Kukhona u-esihle no-esethu.
ILANGA Langesonto: Ubani umuntu obukela kuyena empilweni?
Mantengu: Uscelo Sithole oqale isibhakela ngasekhaya. Ungumholi oneqiniso. Isibhakela sesikhiphe abantu abamqoka. Kukhona oyisosha edemocratic Republic of Congo nosecape Town. Abanye bangabaqaphi bemvelo eziqiwini ze-ezemvelo KZN Wildlife. Bonke laba bantu bathathwa esibhakeleni ngoba sihlale siqatha. Ngimbonga kakhulu usithole ngeqhaza alibambile ezimpilweni zethu. Kumanje usiboniso Gonya esiphuma naye kusithole uphethe ibhande elimqoka.
ILANGA Langesonto: Yiluphi uhlelo olukhonzile kumabonakude nasemsakazweni?
Mantengu: Ngizibukela isibhakela kumabonakude. Ngaphandle kwaso ngibuka iphalamende. Ngiwumuntu othanda ukwazi ngokuqhubeka ephalamende ngoba kulapho kushaywa khona imithetho yokuphatha izwe. Umabonakude kangiwukhonzile ngoba izinhlelo eziningi ziveza abantu besifazane abagqoka izinto ezimfishane. Emsakazweni ngikhonze Abasiki Bebunda nezanamuhla okuyinhlelo zezindaba zokhozi FM.
ILANGA Langesonto: Yikuphi ukudla okukhonzile?
Mantengu: Kuningi kodwa okuhamba phambili ngamasi. Phela ngikhule kusengwa izinkomo ekhaya.
ILANGA Langesonto: Yiliphi izwe ofisa ukuvakasha kulona?
Mantengu: Ngihalela ukuya elas Vegas e-united States of America.
ILANGA Langesonto: Usunayo imoto?
Mantengu: Nginegalofu elidala elihlala ekhaya. Ngihlela ukuthenga iveni ukuze ngikwazi ukuqhuba kahle ibhizinisi lokudayisa izithelo.
ILANGA Langesonto: Ufuna ukwenzani ngemuva kwesibhakela?
Mantengu: Ngifuna ukuvula izinkulisa zezinga eliphezulu ezifundazweni ezahlukene zakuleli. Ngifuna nokusungula isikole ngoba ngiyayithanda imfundo. Okukahle wukuthi ngifunde ngagogoda emkhakheni wokuphathwa kwemali okuzokwenza ngikwazi ukuphatha kahle amabhizinisi ami.