Iziyalo zikabaxter kumdlali webafana ngeportugal
UYALWE kanzulu ngeportugal uthabo Cele ( osesithombeni) obeseqenjini lebafana Bafana ebeligijima imidlalo yecosafa Cup esongwa namuhla ngesonto eroyal Bafokeng Stadium, enorth West.
Izambia izodudulana nezimbabwe kowamanqamu namuhla enkundleni engenhla ngo-15h00. Ucele ugijime umdlalo wakhe wokuqala edlubhe ijezi lebafana ihlula ibotswana ngo-1-0 phakathi nesonto. Ngolwesihlanu ibafana igijime owokugcina walo mqhudelwano neNamibia kubangwa indawo yesihlanu neyesi-6. Kunqobe ibafana ngo-1-0.
Ucele utshele leli phephandaba ukuthi ustuart Baxter ongumqeqeshi oyinhloko nothabo Senong oyisekela likabaxter, bamkhalime kanzima njengoba eyoqala impilo entsha kwibenfica yaseportugal asayine iminyaka eyisihlanu kuyona.
“Ubaxter ungitshele ukuthi uzobadinga kakhulu abadlali abasebancane kodwa abanesipiliyoni sokudlala e-europe. Ungitshele ukuthi ngingakufaki ekhanda ukuthi ngizobanga ijezi nabadlali abanesipiliyoni. Uthe kumele ngenze umsebenzi ngendlela yami kodwa ngiqinisekise ukuthi ngibalalela kahle abaqeqeshi. Uthi akadingi ukuthi ngihlale ebhentshini ngoba ngeke ngiyisize ngalutho ibafana,” kusho lo mdlali.
Ucele uthi kumsize kakhulu ukuba khona kukasenong ongu- mqeqeshi wamajita (SA U/20) ethimbeni labaqeqeshi bebafana. Usenong ubehambe nocele emidlalweni yendebe yomhlaba enqotshwe yi-england muva nje esouth Korea.
“Bengingakulindele ukunikwa ithuba lokuqala umdlalo webotswana. Bengithuke kakhulu ngoba bengingakukholwa kwayikhona ukuthi ngisekhempini. Usenong ungibizele eceleni wangikhumbuza ukuthi ngibuya kwindebe yomhlaba ngakho-ke mangingathuswa yicosafa edlalwa ngamazwe ase-afrika eseningizimu kuphela.
“Ukuba khona kwakhe ekhempini kungisize kakhulu, futhi kusize abadlali abaningi abangakaqini ukhakhayi. Okunye okwenze izinto zaba lula wukuthi ubaxter ukhombisile ukuthi uyakwazi ukusebenza nabadlali abasebancane ngeminyaka yobudala.
“Nokho-ke ukusaba kujwayelekile kubadlali, kanti kuziphelela khona uma usungene ensimini. Sifunde okuningi kubaxter, kanti nabadlali asebekhulile basincede kakhulu,” kusho ucele okhulele kwag Kwamashu.
Lo mdlali izinto zibukeka zimuvuna njengoba esafanelwe wukudlala kumajita nakwi-sa U/23 njengoba esedlala nakwibafana.