Imithombo ethembekile isebenza kanjena-ke
INHLIZIYO yami igezeke ngaphakathi ngolwesine ngesikhathi ipremier Soccer League (PSL) imemezela ukuthi Amazulu FC aphumelele esicelweni sawo sokuthenga igunya lethanda Royal Zulu lokudlala kwi-absa Premiership ngesizini ezayo.
Kuningi okwenze ngahlabeka umxhwele ngalesi simemezelo kusuka ekutheni kwanda imidlalo yesigaba esikhulu ezodlalelwa ethekwini lapho engizinze khona ngokomsebenzi.
Usuthu lubalwa namakilabhu aphethwe ngendlela esezingeni eliphezulu nxa kukhulunywa ngokuhleleka.
Cishe zimbalwa izintatheli zezemidlalo uma kuwukuthi zikhona ezingakhala ngokungatholakali kwabaqeqeshi nabadlali bale kilabhu ngaphambi nangemuva kwemidlalo.
Ngeledlule ngifunde ingosi kakgomotso Mokoena kwisunday Sun enenebula i-orlando Pirates.
Embhalweni wakhe ubale inkinga naleli phephandaba elihlale lihlangabezana nayo kwezimnyama, yobunzima obutholakala emnyangweni wezokuxhumana wale kilabhu selokhu kushiye umickey Modisane osesemnyangweni Wezemidlalo kuzwelonke. Kwibucs muva nje ushoniswa le nale nxa ufuna imvume yokukhuluma nabadlali bayo ngomdlalo.
Nokho kangizogxila kwipirates, ngizobuyela kokunye okushiye igazi lami lithe kla ngesimemezelo SEPSL ngokushaya ibuya kosuthu, lokhu bekuchaza ukuthi umbiko waleli phephandaba eliwushicilele ngesonto lomhla zingama-28 kunhlaba (May) ubuhlaba esikhonkosini. Lo mbiko ubunesihloko esithi: Amazulu FC athenga ithanda.
Lo mbiko welanywe ngomunye ngomsombuluko womhla zingama-29 kunhlaba obunesihloko esithi: Imizamo yosuthu ingaqeda nya ngethanda.
Leli phephandaba libe ngelokuqala ukubika ngalolu daba okwenza abanye osiyazi balinikiza bebona nezinga eliphansi lobuntatheli.
Yomibili le mibiko ifakazelekile ngolwesine njengoba kubuye kwaqinisekiswa ukuthi kuyaphela ngegama lethanda Royal Zulu njengoba sekuvuke irichards Bay FC ephethwe ngusifiso “Jomo” Biyela ezosebenzisa igunya losuthu lokudlala kwinational First Division (NFD).
Kulo mkhakha kayikho into emnandi njengokwethenjwa yimithombo ethembekile, ikupo- tshozele udaba lusavele ngekhanda. Umhleli wezemidlalo engifikele kuyena kuleli phephandaba eminyakeni engaphezulu kweli-15 eyedlule, upannuell Nkwakhwa, wayehleka kuvel’ elomhlathi nxa sibe ngabokuqala ukuphuma nodaba olushisayo.
Ngikhumbula siphume nodaba lokuqashwa kukapaul Dolezar yimamelodi Sundowns ngesikhathi eseshaya ibuya ngowezi-2004. Ngakusasa kwathi nxa sihlangana ehhovisi wathi: “Senze umsebenzi oncomekayo. Sihlule ngisho i-website yesundowns okuyima ilufaka namuhla udaba lomqeqeshi wayo omusha.”
Sengivusa isikole esincanyana nje sobuntatheli, udaba luyaphelela ngomthombo othembekile njengoba kwenzekile sekufakazeleka imibiko yethu esiyipotshozelwe iseyisifuba sezikhulu zikanobhutshuzwayo.