Ubobby ugxekwe nguyise ngechiefs
Umsola ngokusayinisa abadlali abawuvucu
IQHUME kubobby Motaung oyimenenja-jikelele yekaizer Chiefs induku ngokusayinisa abadlali abangekho ezingeni lokugqoka ijezi lale kilabhu edume ngelamakhosi ebhola laseningizimu Afrika.
Ucecil Motaung obhekene nabalandeli bechiefs kuzwelonke, umemezele ukuthi basezinhlelweni zokwakha kabusha le kilabhu esanda kuqopha umlando omubi iqeda amasizini amabili kungekho nkomishi eyinqobile. Ekhuluma enkonzweni yomngcwabo kamichael “Bizzah” Dlamini obalwa nabagadli abavuth’ uphondo abake bagijima kwichiefs, uthe sesifikile isikhathi sokubuyisa udumo lwakudala lwale kilabhu ebingazibheki izinkomishi.
Usole ubobby ngokusayinisa abadlali abangekho ezingeni lokugijima kule kilabhu ebalwa nathandwa kakhulu eningizimu Afrika. Inkonzo yomngcwabo kabizzah ibiyizolo ngomgqibelo e-olive Convention Centre, ethekwini, wabekwa endlini yokugcina emathuneni amaqhawe echesterville.
Ucecil onguyise omncane kabobby uthe:
“Siyakha kabusha ikilabhu ngenhloso yokubuyisa isithunzi ayo. Sizofaka noswazi kubobby ngokusayinisa abadlali abangekho ezingeni lokudlala ekilabhini osekwenze yaphenduka inhlekisa emphakathini.”
Ucecil ubekhuluma egameni lomndeni wakwamotaung kwazise ugcine engaphumelelanga ukuhambela lo mngcwabo ukaizer Motaung nobobby okubikwe ukuthi uhlatshwe wumkhuhlane. Ucecil ulincome kakhulu iqhaza elibanjwe ngubizzah kwichiefs. Ukhale ngokushoda kwabagadli bezinga lakhe kulezi zinsuku.
Ubizzah ungomunye wezingqalabutho zechiefs njengoba eyibambe kule kilabhu kusuka ngowe1970 kuya kowe-1976. Ubalwa nabagadli abashisayo kuleli njengoba uthulas Nxesi ongungqogqoshe Wezemidlalo kuleli ezwakalise ukuthi ubizzah wahlohla ama- hat-trick ali-13 ngesizini eyodwa.
Uthi kulihlazo ukuthi eminyakeni yanamuhla abagadli abavelele kwipremier Soccer League (PSL) baqeda behamba phambili ngamagoli ali-13. Uthi okubi nakakhulu wukuthi abagadli abavamise ukudla ubhedu lokuhlohla amagoli amaningi kusuke kungabokufika kuleli.
Ubheki Cele oyisekela likangqongqoshe wezolimo kuleli, uthe ngezikhathi kugijima ubizzah kwichiefs kwakuchonywa ngamagoli amaningi le kilabhu ebinqoba ngawo. Uthi namuhla bamincela ukunqoba nje kuphela ngenxa yokushoda kwabadlali bezinga likabizzah.
Ekhulumela abangani upannuell Nkwakhwa oyintatheli emnkantshubomvu yezemidlalo, uthe ubizzah ubengakhohlwa ngabangani bakhe. Uthi ubengeyona indoda ethanda ukuhlupha abantu kwazise nangesikhathi eqalwa wukugula ubengafuni kwaziwe, ebalekela ukuzwelwa.