Iqubule uhlevane eyamandiya emsakazweni ivuma FM
IBISHISA phansi inkulumo mpikiswano ohlelweni lukavenessa Marawa wevuma FM ngolwesihlanu ekuseni lapho abamele amaqembu ezepolitiki nabamele umphakathi bebengcweka ngodaba lwenkulumo esuse uhlevane yomholi weEFF umnu Julius Malema ngodaba lwamandiya athile okuthiwa ehlisa isithunzi sabamnyama ethekwini.
Uthwale kanzima umarawa ezama ukulawula izikhulumi zakhe ikakhulukazi uma sekuphakama imimoya kuphikiswana.
Umnu Vusi Khoza ubemele i-economic Freedom Fighters EFF, i-african National Congress ANC imelwe ngumholi wentsha kulesi sifundazwe uthanduxolo Sabelo, kukhona obemele iqembu ledlanzana lamandiya iminority Front umnu Jonathan Annipen, nomnu Vishvin Reddy WE-ANC.
Abalaleli abangene emoyeni bonke bebevumelana nenkulumo eyenziwe ngumnu Malema lapho akhwele khona wazehlela emphakathini othile wamandiya athe axhaphaza abantu ngokubaholela iholo elincane nangokubabukela phansi.
Umnu Malema usho la mazwi emgubhweni wokuqeda iminyaka emine leli qembu lasungulwa. Ukubeke kwacaca ukuthi yena ngeke ambambathe ngalolu daba ngoba abantu bamtshele emehlweni ngesikhathi ehambele imizi ngemizi ukuthi bahlezi phezu kwegeja elishisayo.
Kulolu hlelo usabelo uthe uyahambisana nokushiwo ngumnu Malema, wathi lezi yizinkinga ezaziwayo kepha wathi uthanda kucace ukuthi akusiwona wonke amandiya aphatha abantu ngesandla sensimbi.
Uthe ubona ukuthi kuzomele uhulumeni asheshise uhlelo lokuhlomisa abantu kwezomnotho nokuba izikhungo zikahulumeni ezimele umphakathi zisebenze ngeqiniso ukuze abantu bakwazi ukwethula izikhalo zabo ngokukhululeka. Ukhoza uthe beyi-eff abagudluki enkulumweni kamnu Malema futhi abazuxolisa ngalokho, wathi ukubeke kwacaca ukuthi othintekayo kulezi zinsolo akaqondise izinyawo zakhe enze okuyikho abahloniphe abantu abamnyama.
Nomnu Reddy uthe akakuphiki ukuthi ikhona inhlese yezobuhlanga kuleli wathi kepha ubona ukuthi umnu Malema uvukuza abantu ukuze kube nokungqubuzana ngendlela asekwenza ngayo.
Uthe abantu abaye ezikhungweni ezikhona ezibekelwe ukulalela izikhalo zabo uma kukhona obahlukumezayo.
Kepha omunye umlaleli uthe lezo zikhungo zifana nomdlalo ngoba akulula ukuba zithathele abaqashi izinyathelo, waze wathi akulula ukuthathela umqashi wakho izinyathelo zomthetho ngoba ungalahlekelwa yisinkwa.
Umnu Apenon uthe yize ehambisana nokushiwo ngumnu Malema kepha akaqaphele angabuyiseli emuva ubumbano oseluvele ludalekile phakathi kwentsha yanamuhla ekhula ngokuzwana yazo zonke izinhlanga.
Abanye abalaleli bebezwakala ukuthi bavutha bengabaselwe ngalolu daba besho izigameko eziningi zokucindizelwa nokuxhashazwa abadlula kuzo ngabomphakathi othile wamandiya.
Bonke bagcine bevumelene ngokuthi akube khona isisombululo sokuba kuxoxwe ngezinkinga ezifana nalezi emphakathini kwakheke uxolo nobumbano lwezinhlanga ezahlukene obekuyiphupho likamnu Nelson Mandela.
Abalaleli abangene emoyeni bonke bebevumelana nenkulumo...