ISIDIDIDI BENGAYITHOLI IMALI YESIBONELELO KNOWLEDGE SIMELANE
KUBE nesidididi ezikhungweni zokuholelwa kwemali yesibonelelo sikahulumeni esifundazweni sakwazulu Natal ngesikhathi iningi libuyiselwa emuva lingayitholanga imali kadekle.
Baningi ababuyele emuva bencela izithupha emuva kokutshelwa ukuthi uhulumeni uyibambe ngabomu imiholo ngoba efuna ukwenza isiqinisekiso sokuthi abayiholayo basaphila abazona yini izipoki.
Kwesinye isikhungo esibizwa ngesizakala, emgababa eningizimu yeTheku, izalukazi bezikhala mi izinyembezi zikhononda ngalesi senzo sikahulumeni.
“Bekumele saziswe ukuthi siphathe izidingo zethu uma kukhona abakhala ngakho hhayi ukuba siye emishinini sigibele ngezimali ngethemba lokuthi sizoyithola imali sibuye silambatha. Kumanje nje anginakho ngisho ukudla endlini kuwukusihlukumeza lokhu okwenziwa nguhulumeni kithi,” kuzikhalela isalukazi esizibize ngomakhomo.
Okhulumela umnyango wezokuthuthukiswa komphakathi ophikweni lokuholelwa kwemali yesibonelelo Kwazulu Natal umnu Mbizeni Mdlalose uthe imali ayimisiwe kepha kunohlelo lokuvuselwa kwabahola imali yesibonelelo.
“Siye sibabhalele izincwadi abahola le mali sithi abeze emahhovisi bazovuselela kepha bangezi manje uhulumeni akavumi ukuba sibaholele bengavuselelile. Sicela balethe imininingwane yabo bazoyithola imali yabo ezikhungweni zokuholela,” kuphetha umnu Mdlalose.
Isikhulu esingagunyaziwe ukukhuluma nabezindaba sitshele ILANGA Langesonto ukuthi bayalelwe ehhovisi elikhulu ukuthi bazise abantu ukuba balethe imininingwane yabo ngoba kusaphenywa ngabaholela izipoki.