ISEYINKINGA INDABA YESIQALO SAKHO KONKE
KUNEMPIKISWANO esiqhubeke isikhathi eside ngendaba yokudabuka kwakho konke esikubonayo nesingakwazi ukukubona ngeso lenyama.
Le mpikiswano iphakathi kwencazelo esiyinikezwa yibhayibheli ngemvelo yakho konke, ngakolunye uhlangothi kube yilokho esikuzwa ngososayensi, ikakhulukazi umbono wengisi elingucharles Darwin owaqhamuka nomcabango (theory) we-evolution.
Le ndoda yazalwa mhla ziyi-12 kunhlolanja (February) 1809, yashona mhla ziyi-19 kumbasa (April) 1882.
Indaba yakhe ye-evolution seyadala isithombe esiletha umqondo othi isayensi imelene nonkulunkulu kumbe nebhayibheli eliyizwi likankulunkulu, okungukuthi ososayensi bayizitha zikankulunkulu.
Inzululwazi yezinkolo ezahlukene ikushiya nesimo esithi thatha lokho okutshelwayo noma uvele ukhohlwe wukuthi uyoke uzithole izimpendulo zayo yonke imibuzo ekufikelayo.
Phela ngokwemfundiso kaCharles Darwin, phakathi kokunye kuthiwa umuntu wadabuka ezimfeneni kumbe ezilwaneni ezisamfene nokuthe ngokuhamba kwesikhathi esibalwa ngezigidigidi zeminyaka kwenzeka izinguquko ezazizenzekela ngokwemvelo (natural selection).
Nalapha kwelakithi zikhona izifundiswa ezisemanyuvesi ahlonishwayo ezikholelwa kulokhu, njengoba eminyakeni embalwa edlule kuke kwakhulunywa ngohlaka lwamathambo avunju- luliwe qede ahlanganiswa kwaba yisimo somuntu owethiwa ngelithi nguhomo Naledi.
Futhi imfundiso ethi sadabuka ezimfeneni iyisisekelo sesifundo se-zoology emanyuvesi. Nokho ukuhlobana kwezifundo zesayensi yezinto eziphilayo, esinye sazo okuyi-biochemistry, kuveza ubuciko nokuhlakanipha okujule ngokungaleya kwengqondo yomuntu.
Yonke le nto uma usuyilandelisisa iqhutshwa yindlela yokucabanga ethi akekho unkulunkulu. Nokho ngenkolo kulula ukuchaza imvelaphi yezinto eziphilayo ngoba yona imane nje ithi yonke into yenziwe ngumdali, kuphele ngeswayi.
Abakholelwa kwi-evolution sekwaze kwaba nehlaya elenziwa ngabayizingcweti zokukhuluma sakubagcona zithi “uma kuliqiniso okushiwo yisayensi ngemvelaphi yakho konke, umuntu unelungeloke lokukholwa ukuthi nesichazamazwi i-oxford Dictionary savela ngokuqhuma okuthile okwenzeka emshinini wokugaya izincwadi”!
Nakulo ibhayibheli kuyenzeka ukuba ingaphenduleki yonke imibuzo njengalona othi encwadini kagenesise Isahluko I, emavesini amabili okuqala akuveli kahle ukuthi amanzi wona adalwa ngaluphi usuku ngoba siwathola nje esekhona.
Nosathane ubonakala esethushuka njena ensimini yaseyideni kodwa akushiwo ukuthi yena nezinye izingelosi badalwa nini.
Lokhu sesingakushiyela ekuthini kakade ibhayibheli ligxile kulokho okwenzeka emhlabeni okumayelana nobudlelwano bukankulunkulu nesidalwa esingumuntu.
Incazelo esencwadini kafinis Dake icishe iwuphendule lo mbuzo ngokuthi kwayona indalo inamahlandla (dispensations) angaphezulu kwelilodwa, nakuba engakwazi naye ukuchaza ukuthi mangaki kodwa uthi kunendalo nabantu abake baphila ngaphambi kuka-adamu.
Akuqondakali ukuthi kungani ingadumile indaba ethi ucharles Darwin wake wathi, phecelezi “Ngiseyibhungu, benginemibono eminingi ebizakhekela ekhanda lami. Bengibuza imibuzo eminingi, ngiphenya ngaso sonke isikhathi, kanti ekuphenyeni kwami kwavela lo mbono abantu abawuthathela phezulu wabhebhetheka. Bangcina sebekholelwa kuwona".
Ngaphandle kwalawa mazwi okuthiwa wawasho esemdala esegula, bathi wayeyithanda kakhulu incwadi Kumahebheru yethestamente Elisha.