EZESIMANJE:
ZININGI izinto esike sizenze singabantu kodwa uma usuzibukisisa kuhlale obala ukuthi kasikho isidingo sazo futhi zimosha imali. Umshado ungenye yezinto okuchitheka kuzo imali eningi - kuyedlulela lapho umshado uhlukene khona izigaba ezimbili, okuyisigaba somshado omhlophe, bese kuba ngowesintu.
Lokhu kwehlukana kwezigaba zomshado yinto eyenzeka kwindlu emnyama, okuye kuthi uma uyicabanga, uzibuza ukuthi isho ukuthini - kube nzima ukuthola impendulo eqondile.
Umshado omhlophe yilapho umakoti esuke eshaye ingubo yakhe emhlophe qwa, nomkhwenyana eshaye isudi kanti yiwona obukeka udla kakhulu ephaketheni. Okulandela lapho kuba wumshado wesintu lapho kusuke sekufakwe khona imvunulo, kwabiwa, kusinwa kuqephuzwa.
Empeleni le ngxenye yesintu yiyona ebalulekile kakhulukazi kubantu abamnyama ngoba ihambisana nemvelaphi yabo kanti le ngxenye yomshado omhlophe kukholakala ukuthi yisitayela nje esifike nabasentshonalanga.
Kasisho-ke ukuthi kukhona icala noma iphutha ngokwenza umshado omhlophe uma umuntu ethanda. Iqiniso wukuthi amaphakethe abantu kawafani. Kuye kube nzima nje lapho uthola ukuthi umuntu uze angene shi ezikweletini aze avele ngentamo enza umshado omhlophe, mhlawumbe esingathi kawunasidingo kangako.
Isikhathi esiphila kuso manje sidinga ukuba sibheke ukuthi imali yethu siyichitha kuphi noma siyisebenzisa ngayiphi indlela. Kufanele futhi sibheke ukuthi ukushada kabili kunamuphi umthelela kwezezimali, ikakhulukazi kulabo abayenza bazi kahle kamhlophe ukuthi iphakethe kalivumi kahle.
Njengoba ngike ngasho ukuthi ithanda ukudida le yomshado omhlophe ukuthi wenzelwani ngoba nalabo okukholakala ukuthi yinto yabo abenzi njengoba kwenza thina ndlu emnyama.
Kumele sikhumbule ukuthi ezinye izinhlanga zisuke zingakhokhanga ngendlela thina ndlu emnyama esisuke sikhokhe ngayo ngaphambi kosuku lomshado, njengoba sikhokha ilobolo kwenziwe neminye imicikilisho edla imali.
Kuye kudabukise lapho uthola khona ukuthi umshado usudlulile kodwa akade beshada bavele ngentamo ezikweletini.
Ngesinye isikhathi kuze kube nzima nokuqhubeka kahle nempilo ngenxa yokuthi basuke besachitha imali eningi ezikweletini zomshado osudlule.
Konke lokhu kushiya umbuzo wokuthi kuze kuphilwe kanzima nje kungani vele kufanele kwenziwe imishado emibili nokuthi kubaluleke ngani ukuba sifune ukwenza isiphihli.
Ngabe sisuke sifuna ukubukwa? Kusisiza ngani-ke lokho kubukwa ngoba kakusibuyiseli ngalutho kodwa kusikufaka ezinkingeni zezezimali. Baningi abantu esibaziyo abangene emahlazweni ngemuva kwemishado yabo ewubukhazikhazi, sekuvela ukuthi bayehluleka wukukhokhela izindleko zemishado. Usolwazi Jabulani Maphalala oyisazi samasiko esintu uthi le ndlela yokwenza itshengisa ukuthi