WELAPHA ABANINGI UTHANDEKA DAWN KING
UKUZIMISELA nokusebenza kanzima uthi yikho okumenze wafika kuleli zinga akulo umlingisi oyintandokazi kubathandi bemidlalo kamabonakude.
Uthandeka Dawn King uqeqeshelwe ukulingisa etechnikon Natal esibizwa ngeDurban University of Technology manje.
Uthi ngesikhathi ethola uqeqesho babengaqeqeshelwa ukulingisa kumabonakude kodwa beqeqeshelwa ishashalazi nokuyilapho okumele utshengise imizwa khona.
Uthi lokhu kumsizile ukuba akwazi ukuba angene khaxa kweminye imidlalo abelingisa kuyo okubalwa kuyo Uzalo, ilockdown nenkaba. “Ukusebenza nabantu engikhule ngibabukela kumabonakude futhi engibahloniphayo okuwu nojohn Kani, ubaby Cele, uleleti Khumalo bekungigqugquzela. Kungenze ngasebenza kanzima, ngabona ukubaluleka kokufunda nokucwaninga indawo engiyidlalayo. Uma usebenza nezinkakha kumele wenyuse amasokisi ukuze ungasali ngemuva,” kusho yena.
Ekhuluma ngezindawo aseke wazilingisa ukuthi zimnike siphi isifundo, uthi ukulingisa kwinkaba njengomuntu osebenza endlini kumfundise ukuthi umuntu osizayo nguye owumgogodla. Uthi (abasebenza ezindlini) bagcina sebazi kangcono ngawe njengomqashi futhi sebazi ngisho izimfihlo zomndeni.
Uzalo lumfundise ukuthi uphila kanjani njengowesifazane kwazise yibo abafudumeza ikhaya, uthi uma ikhaya lingenaye umama livele libande. Uphinde wafunda nangesithembu ukuthi abantu besifazane bakwazi ukubekezela kangakanani.
“Indaba yesithembu yinto esingundabamlonyeni eningizimu Afrika. Lokhu kusho ukuthi yindaba ebonakalayo ukuthi iya kuphi. Idinga ubaba ozoba ngumholi ukuze abesifazane bazwane,” kusho yena.
Kwilockdown uthi ufunde ukuthi kunengxenye eke ingabhekwa ngasifazane abasuke beboshiwe, kubhekwe ukuthi basuke beboshelweni. Ukuthi kokunye kuba wukuthi bebekade mhlampe bezivikela ekuhlukunyezweni.
Uthi kuye kungamphathi kahle uma abantu bethi umsebenzi wokulingisa ulula, bawuthathe noma yikanjani. Uthi lo wumsebenzi okumele uhlonishwe njengeminye.
“Thina siyisibuko sezwe, sixhumana nabantu yingakho kungiphatha kabi uma sibukelwa phansi. Kukhona abantu abadlula ezinkingeni esisuke sizilingisa, ngokubuka thina bagcine sebethola isiso- mbululo. Ngenye indlela selapha isizwe,” kuchaza udawn.
Udawn ungumuntu oneziphiwo eziningi okubalwa kuzo esokuba ngumlingisi, umculi nesiphiwo sokwelapha ngokwesintu.
Uthi emuva kokulandela ubizo izinto zakhe zivele zamkhanyela zangaba nzima njengoba ayecabanga.
“Ngingumuntu onesithunywa. Uma umuntu efikile ngiyahlala phansi ngimsize.
“Kodwa-ke ngokuhamba kwesikhathi ngibonile ukuthi laba bantu engihamba nabo bafuna ukwelapha abantu abaningi ngesikhathi esisodwa.
“Okungukuthi ngokomsebenzi engiwenzayo wokulingisa ngikwazi ukuba ngelaphe abantu, baningi abantu okuke kuthi uma bengibona bangitshele ukuthi ngabelapha ngendawo ebengiyidlala ngaleso sikhathi,” kuchaza yena.
Udawn uqokwe kumzansi Viewers’ Choice Award ngaphansi komunxa wabalingisi besifazane.
“Ngizizwa ngibusisekile futhi ngithobekile.
“Ukuqokwa nje kukodwa kusho lukhulu kimina. Izinto ebengizikhulekela ngibuka sengathi zivele zasheshe zaphenduleka ngingakalindeli,” kusho yena.
Uthi unesifiso sokuba indondo ize Kwazulu-natal. Unxenxa abalandeli ukuba bamvotele ngokuthumela umqhafazo othi: 7E ku-39201 mona ngokushaya inombolo ethi: *120*33033#
tzondi@ilanganews.co.za