THANDI ZONDI
HHAY’ bo, kukhona lo bhuti wakwazuma okhuluma kuze kweqe! Ningangibuzi igama lakhe ngoba ngiyamesaba kodwa lona liqala ngo-e.
Angishongo-ke njalo ukuthi ngu-edward, wena ozicabangela u-eddie, ungangifaki lapho. Cha bandla uyakuthanda ukukhuluma lowa bhuti ngathi wagwinya imfengwane. Indlela akhuluma ngayo ngathi usuke enzela ukugqama. Kodwa-ke usungaze ukhulume mtakazuma, phela awujwayelekile nawe, awufani nje noduduzani, nokhulubuse abantu abaziwayo.
Bona abadingi ukukhuluma kakhulu ngoba vele siyabazi. Angiyiphathi phela ekaduduzani ngoba uyigupta elincane, lol.
Yey’ cishe ngakhohlwa, awungitshele we-eddie, konje wena wenza msebenzi muni vele?
KODWA Mr Gwaragwara unezimanga! Uyazi kade ngikuncenga zolo lokhu ngithi awuzinze kwigwara Nation, ungayidayisi. Ngingakawuvali nje umlomo sengizwa kuthiwa usuyancethezela, ubheke emabala uyocela ama LB (Love back). Kodwa mfokadlamini konakelephi ngempela? Awuchazele umzala mhlampe uzokusiza. Uhlulwa yini ukuzinza? Ngiyabona ukuthi wona umqondo unawo kodwa inkinga ngathi yisibindi nje oshoda ngaso. Uyazi besijabula ngesonto eledlule sikubona ezinkundleni zokuxhumana usayina amaciko. Manje njengoba usuncenga ukubuyela emabala uthi azoshonaphi wona.
BAPHATHI bomsakazo wami engiwuthandayo, ukhozi FM, sengifikelwa wukudabuka manje ngongizwe Mchunu. Phela ngicabanga ukuthi indlela asezehlise ngayo manje isiyanele. Uma ezwe kuthiwa ukhozi luzobe lusakaza bukhoma endaweni thizeni, umfica khona egidela abalaleli kodwa kungasakazi yena.
Angazi noma yisizungu noma wukuthanda abalaleli yini. Kodwa ngiyaqala mina ukubona umuntu ohambela yonke imicimbi exhaswe wukhozi FM. Lokhu kucacisa ngokusobala ukuthi ayikho into ayenzayo emini. Okungcono mnikeni umsebenzi wokushayela ibhasi lokusakaza. Ngimbone olundi emcimbini kamntwana wakwaphindangene, ebingelela wonke umuntu, ngisho abangamboni. Baphi abafazi bakho Ngizwe, asisababoni?
DUMA Ntando ngeke, awuziqoqe phela sisi. Okokuqala usanda kuthola umntwana nje. Uyazi ukuthi ukuteta kuyafana nokushonelwa? Kunezinto ozizilayo nje ungazenzi, uze uzenze ngemuva kwesikhathi esithile. Usuke usamile nje okwesikhashana.
Akukakapheli nenyanga nje umntwana wakho ezelwe kodwa usudansa le midanso yakho ezinkundleni zokuxhumana! Ulahla umlenze nje uze uba nesibindi sokufaka ezinkundleni zokuxhumana.
Ngeke sisi, yehlisa ka-ncane ulinde ingane ikhule. Udumo lolu luyanisanganisa.
NGIYALIHLONIPHA iculo lesizwe unkosi Sikelela i-africa, liveza amahlazo. Ngeledlule olundi kuthe uma kuthiwa abesilisa mabakhumule izigqoko, ngacishe ngawa phansi ngethuswa ukhekhelezi lwempandla kadj Oros. Hawu bengingazi ukuthi amakepisi afihle lukhulu kanjena. Ngelinye ilanga Oros wobaleka uzephule uma kuthiwa abesilisa mabakhumule izigqoko.
Phela kangicabangi ukuthi yinto ofuna ibonwe ngabantu lena esekhanda. Kazi uneminyaka emingaki?