EZAMAFILIMU: ZOWAKHA MBATHA
GIRLS TRIP UMQONDISI: MALCOLM D.LEE ABADLALI ABAPHAMBILI: Regina Hall (Ryan), Tiffany Haddish (Dina), Jada Pinkett Smith (Lisa), Queen Latifah (Sasha), Mike Colter (Stewart), Kate Walsh (Elizabeth), Larenz Tate (Julian), UHLOBO: Comedy IMINYAKA: 16 D/L/S UMHLAZIYI: ZOWAKHA MBATHA
IFIKE ngesikhathi esihle impela le filimu njengoba okuningi kwenzeka kwiEssence Music Festival, enew Orleans, njengoba netheku lilungisela lona leli dili likamkhipheni maduze kuleli dolobha.
Lindela ukuhleka uze ubambelele ezihlalweni kodwa ubuye uzwele njengoba kuvela izigigaba ezahlukene zempilo ikakhulukazi uma kuza kwezobudlelwano kwabashadile nabangani. Ingezintokazi ezine esekuphele iminyaka eyisihlanu zingahlangani.
Zivumelana ngokuya kule festivali njengoba omunye wabo uryan eyisimenywa esiqavile njengoba engumbhali wencwadi enesasasa nenikeza ithemba.
Okubuhlungu wukuthi emshadweni wakhe (nguyena yedwa onendoda kulaba bangani) noStewart izinto zimapeketwane njengoba le ndoda inomakhwapheni osaziwa nangumfazi.
Ngale mpelasonto yefestiveli benza konke okubakhumbuza ubusha babo okufaka phakathi utshwala, amaphathi angapheli nokufunana nesilisa.
Udina nguye ofaka impilo kulaba njengoba ezisanganela nje. Umakhwapheni lo ukhona la kule festiveli.
Kuba nzima ukugcina ubungani njengoba omunye wabo eyintatheli ebhala ngosaziwayo kanti leli bhizinisi lakhe kalihambi kahle kuze kube nokulingeka abhale ngalo mngani wakhe nomyeni ngoba useyazi kunesithombe esesitholakele beqabulana neshende kuyona le festiveli.
Kubuhlungu uma sekuvela ezithi umakhwapheni ukhulelwe kanti uryan uveza ukuthi usezame konke ukuze akhulelwe kodwa kungenzeki.
Abaphathi babo babaphoqa ukuba batshele umhlaba ukuthi konke kuhamba kahle emshadweni wabo uma esethula inkulumo kule festiveli.
Kwenzeka konke lokhu nje, kunojulian onehlo kuryan, nobengalala kalula naye ezikhawini eziningi kule festiveli ukuba ubeyindoda engeqotho. Ayaphuma amaqiniso ekugcineni. Ngeke nakancane ungayithokozeli le, ngingabeka ngisho isenti lami lokugcina.
Uzothola nokubona inqwaba yabaculi inandisa kule festiveli esingabala phakathi kwabo umaxwell, ucommon, Puff Daddy, ufaith Evans, une-yo nabanye. Ingene ngolwesihlanu e- cinema. zowakha@ilanganews.co.za
IMPELASONTO edlule yomhla zingama-28-30 kuntulikazi (July) ishiye IDESPICABLE ME 3 isahamba phambili ngokufaka imali njengobe ifinyelele ku-r 39 990.907 kanti uhlu lwayishumi ahambe phambili belumi kanje:
1. DUNKIRK 2. DESPICABLE ME 3 3. SPIDER-MAN: HOMECOMING
4. VALERIAN & THE CITY OF A THOUSAND PLANETS 5. WAR FOR THE PLANET OF THE APES
6. CAPTAIN UNDERPANTS 7. TRANSFORMERS: THE LAST KNIGHT
8. BAYWATCH 9. VICEROY’S HOUSE 10 MUBARAKAN