SIVULAMEHLO ABACULI:
BASINCISHA ubumnandi abadlali bezinsimbi, kabasacikozi ngezihlabo uma beqala izingoma noma beziphetha.
Umculo wakudala bewudlisa ngesiqalo sengoma kube sengathi ingeqhubeke kodwa ilokhu iphindaphinda isiqalo sayo. Isiqalo sengoma sithi masifane nesiqalo sendaba ngisho kwezokuloba, izintatheli zifundiswa ngokuloba isiqalo sendaba esihehayo, phecelezi kick off.
Ngisho ingoma idlalwa ezitolo ezidayisa umculo umthengi uma ezwe isiqalo samheha uvele ayifune ngokushesha, acimeze amehlo ayithenge engaqondile, aze abuze ukuthi idlalwa ngubani leyo ngoma.
Abaculi nabo banelungelo lokusiza abadlali bezinsimbi, uma beqamba amaculo babatshele ukuthi bafisa ingoma iqale kanjani futhi iphethe kanjani.
Kuyaziwa ukuthi abaculi abaningi kabanazo iziphiwo zokudlala izinsimbi kodwa kuye kube kuhle umculi abhidilishe ngephimbo asho ontililintinti ngomlomo, enikeza umdlali umqondo wezihlabo azifisayo.
Komasikandi kuyaphoqa ukuba baziqikelele izihlabo, zisemthethweni selokhu kwathi nhlo kulolu hlobo lomculo. Iyancinzwa inta- mbo noma imfanyazwe ngempela inkositina. Uma sikhuluma ngezihlabo zenkositina sikhumbula umculi ongasekho, ulahlumlenze. Ubepikwa ngamabhendi amaningi kamasikandi ngekhono lakhe.
Esigingcini esihamba phambili basazozalwa abayofika kumfazomnyama umfokakhumalo naye ongasekho.
Ziningi izinsizwa esingazibala ezinamakhono ekuqaleni izingoma ziziphethe kamnandi. Noma-ke uma kuqoshwa sekuvamise ukuba izingoma zehliswe zize ziyosithela kusezwakala kamnandi uma ingoma inesiphetho sayo esimnandi.
Umaqhude Mkhize ungumdlali wesigingci sebhesi ovelele eningizimu Afrika, siyamkhuthaza ukuba naye avuselele isiphiwo sikasipho Gumede ongasekho obeqala ingoma ngesigingci sebhesi kusangane izihlwele.
Ingoma yakhe esihloko sithi “Mantombi” akulula ukuba idlule ezinhliziyweni zabantu ngenxa nje yesiqalo sayo. Siyabakhuthaza abaculi ukuba uma beqamba izingoma, ibe nawo wonke umsoco, bangaqambi imvunge namagama nje kuphela - kepha bayakhe ibe wukudla okuphelele okunazo zonke izinongo nezithako ezifanele.
Nonyaka ake sizwe izingoma ezineziqalo ezimnandi kuyo yonke imikhakha nezinhlobo zomculo, sizwe umehluko.
Njengengoma nje esihloko sithi “Everybody” yeqe-mbu leblack Box - le ngoma yindala kepha namanje isagqoma kusithele igundane.
Igama elithi “iciko” alisetshenziswe ngokuyikho, abantu bacikoze emculweni bazinike isikhathi bangabi ngomasheshisa.
knowledge.simelane@ilanganews. co.za