UTHI UZOGUBHA INYANGA YABESIFAZANE OSHINTSHE UBULILI BESILISA
USUKU lwabesifazane yilona olubalulekile futhi lumnika ithemba empilweni ngoba uyaye azizwe ephelele. Usho kanje umnu Luyanda Mzimela (24) ( osesithombeni) othi uyi-transgender okusho ukuthi wahlinzwa washintshwa ubulili.
Uthi wazizwa eneminyaka emine ukuthi akasiyena nhlobo umfana ngoba wayeya endlini yangasese namantombazane uma efisa ukuzikhulula. Uthi nesikhathi esiningi wayesichita edlala nawo amantombazane, wase eba nesifiso sokuthi ngelinye ilanga ahlinzwe esithweni sakhe sangasese ukuze siguqulwe sibe ngesowesifazane ophelele kwazise imizwa yakhe yayihambisani nalesi sitho ayenaso.
Uluyanda ohlala emlazi usebenza njengomeluleki WEHIV & AIDS -Durban Lesbian & Gay Community & Health Center emoningside. Uthi uxoxa udaba lwakhe lwempilo noba efisa abantu bakuqonde kahle lokhu kokuthi kuyenzeka uzalwe unesitho esithile kodwa imizwa yakho ikutshele okunye.
"Buningi ubunzima esibhekene nabo namanje emiphakathini ngoba siyahlukunyezwa sibizwe ngawo wonke amagama amabi. Ngenhlanhla umndeni wakithi uyangithanda futhi uyangeseka kodwa ngiyazi ukuthi la ngaphandle kunabantu abasibiza ngamadimoni noma bethi bazokuphihlisa ngewisa kuphume ubutabane.
Abanye baye bathi bazokuyisa enyangeni kodwa ngifisa bazi ukuthi kawukho umehluko ozokwenzeka ngoba sidalwe sinje nathi kasikwazi ukuzishintsha. Kubuhkungu ukubulawa kwethu ngoba nakhu bethi kasamukelekile emphakathini. Kanti ngabanjani abamukelekile? Sinxenxa ukuthi uhulumeni asivikele ngoba sibhekene nezinkinga ezinkulu,” kusho ulu-yanda.
Uthi ujabule kabi njengoba sekuqale imigubho yenyanga yabesifazane nje. “Ngeke ngisale ngaphandle ukugubha usuku lwabesifazane, nami ngiyazazi ukuthi nginguye. Abantu kumele basamukele, basihloniphe njengabantu besifazane," esho.
Inhlangano ilesbian Gay Bisexual & Transgender Community (LGBT), iyona eyamnika ithemba empilweni uluyanda ukuze akwazi nokuba nabangani. Uthi ngelinye ilanga uzoba nomndeni naye njengawo wonke umuntu.
"Ngiyafisa ngelinye ilanga ukuba nomndeni nezingane njengoba lukhona uhlelo olubizwa nge-surrogacy engingalusebenzisa ukuba nomntwana la uyaye udinge umuntu bese isidoda sakho sihlanganiswa namaqanda alowo wesimame kusetshenziswa imishini nohlelo olubizwa nge-invitro fertilization (IVF) ukwenza umntwana," kusho uluyanda.
Ugcizelele ukuthi abazali mabazithande izingane zabo basamukele isimo uma ziphila lempilo ngoba akukho abangakushintsha kulokho.
“Nakulo nyaka sizokwenza umcimbi njengenjwayelo sibungaza inyanga yabesifazane emahhovisi ethu," kusho yena.