Uthanda inyama yangaphakathi
KUHLENGEZELA izinyembezi emehlweni kubrighton Mhlongo (26) uma ecabanga usenzo “Nzori” Meyiwa obengumngani wakhe omkhulu. Bakhule ndawonye kwiOrlando Pirates becijwa ezintini. Umhlongo udabuka eprotea Glen, esoweto.
Ufunde ehomegele Primary, emopele Secondary unyaka wase edlulela ejohannesburg Secondary lapho ephothule khona umatikuletsheni.
Wenze imarketing Management eboston College. Nakuba eneminyaka eli-13 ayihlale kwibucs kodwa uke wabolekiswa emakilabhini ahlukene.
Ibhola lakhe liqale ukugqama ekwimothupi Birds esayiniswa ngusilas Mothupi ngaphambi kokujoyina igarankuwa United ayisize ukuvika izembe.
Udlulele kwibatua FC ahlale kuyona isonto elilodwa waya kwifc AK. Emuva kwesizini ufunwe yisupersport United okuthe ezitshela ukuthi uzodlala kuyona wathola ucingo oluthi useyafuneka kwipirates.
Kwipirates ufice umeyiwa obesanyiwa yisikimu ngaleso sikhathi. Benze okuningi ndawonye kubalwa ukuthembela kunkulunkulu ukumnxusa ukuba avule ithuba labo. Lokhu kwenza ukuthi bobabili ngokwehlukana baguqe ngamadolo bakhuleke njalo emuva kwemidlalo.
Bafundisane nokujabula ngokugxumagxuma ngendlela efanayo epalini uma ezabo zishaya igoli. Uthi kube nzima kakhulu ukuthatha indawo kameyiwa ngesikhathi eshona ngokudutshulwa ngowezi-2014.
Kuze kube yimanje abakabanjwa ababulali bakhe yize afela kubo kanina wengane yakhe, ukelly Khumalo, evosloorus, egoli. Umhlongo uthi umeyiwa washona emlindele emcimbini karooi Mahamutsa ababevumelane ngokuthi bazohlangana kuwona kanti sebezothola izindaba zokuthi uselimele.
Ingxoxo yangaphandle kweNkundla YELANGA Langesonto nomhlongo ihambe ngalolu hlobo:-
ILANGA Langesonto: Kawuchazele abafundi ukuthi ungumuntu onjani?
Mhlongo: Ngizithobe kakhulu futhi ngilikholwa. Ngikukhonzile ukuchitha isikhathi nabangani bami sihambele izinxanxathela zezitolo ezahlukene ukushaywa umoya. Kangiyena umuntu othanda ukuhlala yedwa.
ILANGA Langesonto: Yiliphi ibandla okhonza kulona?
Mhlongo: Ngikhonza egrace Bible Church nakuba ekhaya bengamaluthela. Nokho ukuba sezinkonzweni ezahlukene kakuxabani ngoba sikhonza unkulunkulu oyedwa.
ILANGA Langesonto: Ukhulele ekhaya elinjani?
Mhlongo: Bekunzima kakhulu. Sikhule sithwele kanzima, abazali bami benza imisebenzi engatheni ukuxosha ikati eziko. Ngike ngaqoma ukujoyina igarankuwa United kwazise umphathi wayo, udinkie Ratlhagane, wayezongifundisa eboston College lapho engenze khona izifundo zemarketing Management. Nokho kangiziqedanga ngenxa yokuxinwa umsebenzi webhola.
ILANGA Langesonto: Basaphila abazali?
Mhlongo: Ngumama, unancy Mhlongo, osaphila. Ubaba (umoses) udlule emhlabeni sengikwipirates. Nginabafowethu usbu kulandele mina bese kuba ngu- Dumisani omncane.
ILANGA Langesonto: Yisiphi isipho esimqoka oke wasipha abazali bakho?
Mhlongo: Ngicabanga ukuthi ezimqoka kakhulu yijezi lepirates elingunombolo-41 engalinika umama nokwandisa umndeni ngokushadelwa ngu-onika Dimakatso.
ILANGA Langesonto: Seninazo izingane nonkosikazi wakho?
Mhlongo: Yebo, sibusiswe ngendodakazi, ulesedi Alexander, eneminyaka emibili ubudala.
ILANGA Langesonto: Yikuphi ukudla ozifela ngakho?
Mhlongo: Ngikhonze i-rice nesitshulu noma uphuthu nenyama yangaphakathi.
ILANGA Langesonto: Ulalela nhloboni yomculo?
Mhlongo: Ngithanda kakhulu ukirk Whalum, udonnie Mcclurkin nebarorisi Morena.
ILANGA Langesonto: Ngabe uyayibuka imidlalo ewuchungechunge?
Mhlongo: Yebo, ngithanda kakhulu igenerations: The Legacy nethe Queen. Umlingisi engizifela ngaye ngubrutus wethe Queen.
ILANGA Langesonto: Uphatha nhloboni kamakhalekhukhwini?
Mhlongo: Yi-iphone 5, ngiyithanda ukufa. Ezinkundleni zokuxhumana ngitholakala kwi-instagram nakwiwhatsapp kuphela, okunye kanginakho.
ILANGA Langesonto: Ushibilika ngamotoni?
Mhlongo: Nakuba nginezimoto ezimbili IBMW nepolo kodwa ngisebenzisa kakhulu ipolo ngoba kangiyena umuntu okhonze ukubukwa. Ngifuna intsha ibone ukuthi ungahamba ngemoto engabizi kakhulu ngisho udumile. Kasikho isidingo sokuzifakela ingcindezi ngokufuna ukubonakala njengophila impilo ephambili.
ILANGA Langesonto: Yisiphi isi- lwane osithandayo?
Mhlongo: Kanginaso engisithandayo kodwa engisesabayo yinyoka.
ILANGA Langesonto: Yiliphi izwe ofisa ukulivakashela?
Mhlongo: Yispain, kunendawo okuthiwa yi-ibiza enhle kakhulu.
ILANGA Langesonto: Uthanda umbala onjani?
Mhlongo: Ngikhonze oluhlaza okwesibhakabhaka, ungenza ngiziwe ngizelwe kabusha.
ILANGA Langesonto: Ngabe achazani ama-tatoo asesandleni sakho?
Mhlongo: Isiphambano sichaza ukholo lwami kunkulunkulu, imbali ikhombisa ukukhululeka nokuthi ukubekezela ekugcineni kuletha umvuzo empilweni. Phela imbali idinga ukunakekelwa ngaso sonke isikhathi ukuze ingabuni.
ILANGA Langesonto: Unaziphi izinhlelo uma usubeke amakhokho ethala?
Mhlongo: Ngibhalise inkampani ebizwa ngerbc Trading ephekayo ibuye ihlanze izindawo ezahlukene neyokudayisa izindlu ebizwa ngeproperty Africa. Sisungule NEBMF Foundation sinabangani bami ebhekene nokuqwashisa sibuye sisize abahaqwe yisandulela ngculazi nengculazi uqobo, umdlavuza, sithengele abafundi abaswele imiqabelo, silwisane nokuhlukunyezwa kwezingane ukubala nje okumbalwa ebhekene nakho.
ILANGA Langesonto: Yikuphi okumqoka okuzuze ebholeni?
Mhlongo: Wukuqokelwa ekubeni ngumdlali wosuku inyanga yonke ngesizini yezi-2015/2016 okwaholela ekutheni ngiqokelwe kumasa Sports Awards sinohappy Jele. Kuleyo sizini ikilabhu yakwazi ukufinyelela kowamanqamu wecaf Confederations Cup. Lona wumlando engingasoze ngawulibala.
ILANGA Langesonto: Uthini umyalezo wakho entsheni?
Mhlongo: Kumele ingalilahli ithemba emaphusheni ayo, izikhandle ukuthola izithelo ezinhle. Izinselelo ziyingxenye yempilo ukunqoba ezinye kukhuphula ugqozi lokubhekana nezilandelayo. Kumele ingakhohlwa wukuthandaza.
ILANGA Langesonto: Yimuphi umqeqeshi ongasoze wamukhohlwa empilweni yakho?
Mhlongo: Nguroger De Sa ngokunginika ithuba lokudlala esigabeni esiphezulu no-eric Tinkler ngokukholelwa kimina emidlalweni yecaf. Ngeke ngimlibale udan Malesela obengicija kwigarankuwa no-alex Rivoredo wasebrazil osekwikaizer Chiefs. Ngimbonga kakhulu nosihlalo wepirates, udkt Irvin Khoza ngokukholelwa kimi.