UKHOZA BAMDOBE NGEMALI UKUDEDELA U-OUPA MANYISA
IMALI econsisa amathe ethenjiswe u-irvin Khoza ongusihlalo we-orlando Pirates kuvela ukuthi yiyona eyenze wadedela u-oupa Manyisa obengukaputeni wezakhe ukujoyina imamelodi Sundowns eyizimbangi zamaBhakabhaka.
Ipirates yenze izinguquko ngolwesine imemezela umilutin “Micho” Sredojevic waseserbia njengomqeqeshi omusha wale kilabhu. Uthatha umsebenzi kukjell Jonevret wasesweden osule isigubhukane ngolwesithathu.
Leli phephandaba lithole ukuthi lo mqeqeshi usula nje, umicho ubesenesonto vele esayine nebucs.
Kuthiwa ujonevret uhlulwa yikaizer Chiefs ngo-1-0 kwicarling Black Label Cup ngeledlele EFNB Stadium, esoweto, nje umicho ubesevele eqede konke neBucs. Ukhoza uphinde wamemezela ukuthi umanyisa uzogijima kwimamelodi Sundowns ngesizini ezoqala.
Idowns kudala vele yayimfuna umanyisa kangangoba kwaze kwaba namahlebezi okuthi usayinile nayo ebe engasayinile.
Leli phephandaba lihletshelwe yimithombo yalo encikene kakhulu nokhoza ukuthi ununuselwe ngo-r6 million ngomanyisa wamdedela.
Kuzokhumbuleka ukuthi akuqali ukwenzeka lokhu njengoba naphambilini idowns imnunusele ngemali wayidedelela ugift Leremi ongasekho emhlabeni, ulebohang “Cheeseboy” Mokoena noteko “Ace” Modise ngokwahlukana.
Nokho kuthiwa umanyisa angase aphambane nomogakolodi Ngele, ucuthbert Malajila noAsavela Mbekile abafana nefenisha kule kilabhu kamengameli upatrice Motsepe.
Ukhoza akazange ayidalule imininingwane yokusayiniswa kukamanyisa kwazise lo mdlali ubengakasayini nedowns ngokugcwele, bekusavumelane amakilabhu nje kuphela ngokudayiselana.
Nokho kuthiwa imali yokuthengwa kukamanyisa isingenile kwi-akhawunti yebucs, idowns kayizange icucuze kwazise bekungekho ukuphikisana ngesamba.
Ukhoza ubonge kakhulu umanyisa ngomsebenzi omuhle awenzele ikilabhu.
“Ube ngumholi oqotho wayimela ikilabhu kukuhle kukubi. Ngimufisela inhlanhla,” kusho ukhoza.