USADLA AMATHAMBO ENGQONDO U-IGESUND NGEBUYA EBHOLENI
UGORDON Igesund ozakhele olukhulu udumo kunobhutshuzwayo waseningizimu Afrika enqoba izicoco ezine zepremier Soccer League (PSL) namakilabhu ahlukene kuvela ukuthi ugaqelwe ngamakilabhu ase-europe.
U-igesund oke wacija nebafana Bafana ugcine ukuqeqesha kwihighlands Park ngasekupheleni kwesizini edlule. Uyishiye isivele ngesicholo esizibeni esibheke kwalasha. Ligcine liyigojelile izembe yashoveleka phansi kwinational First Division (NFD).
Njengamanje lo mqeqeshi uhleli akakasayini nakilabhu. Leli phephandaba lihabule ngemithombo yalo ukuthi lo mqeqeshi angase alibhekise e-europe njengoba kunamakilabhu amfunayo. Kuthiwa kunamazwe alapha e-afrika amgaqele ukuba azowalolonga. I-uganda esanda kulaxazwa ngumilutin “Micho” Sredojevic kuthiwa ngelinye lamazwe afuna lo mqeqeshi kodwa umanqika ukuyijoyina ngenxa yerekhodi layo elibi lokungabaholeli abaqeqeshi. Usredojevic uhanjiswe wukuthi bese kuphele izinyanga eziyisi-6 engaholi nemihlomulo abethenjiswa yona engayitholi.
Leli phephandaba lishayela u-igesund ngalolu daba, ukuqinisekisile ukuthi bakhona abamthintayo kodwa okwamanje usapholisa ikhanda.
“Kangifuni ukuxhamazela, ngisapholisa ikhanda ngoba kangifuni ukuthatha isinqumo engizozisola ngaso. Njengoba ngikhuluma nawe nje ngiyazijimela ngoba ngihlose kona ukupholisa ingqondo. Kodwa-ke ngingakuqinisekisa ukuthi bakhona abangithintayo lapha e-afrika naphesheya kodwa njengoba ngisho nje kangifuni ukuxhamazela. Ngizobona ngokuqhubeka kwesikhathi ukuthi nginquma kanjani,” kusho u-igesund.