ISIKHALO SIKAMICHO NGABE-BUCS
Ufuna kubonakale ushintsho ngokushesha
BAHLELI ngesinqe abadlali be-orlando Pirates njengoba kuvela ukuthi usihlalo wale kilabhu u-irvin Khoza unike umqeqeshi wale kilabhu igunya lokuvulela izembe uma kukhona angabadingi.
Ukhoza umemezele umilutin “Micho” Sredojevic njengomqeqeshi omusha wale kilabhu ngoLwesine. Uthatha umsebenzi olaxazwe ngukjell Jonevret wasesweden osulile. Ukhoza weluleke usredojevic ngokuthi aqinise amatomu kule kilabhu angalinge akuvumele ukuthi kube yikwampunzi edla emini.
Kuthiwa enye yezinto ebulale ujonevret wukuthi ubenovalo ukuqondisa izigwegwe kubadlali abadala bale kilabhu.
Leli phephandaba lithole ukuthi lo mqeqeshi uzozinika leli sonto ukubhekisisa bonke abadlali bese enquma ngazobagcina nazobadedela.
Kuthiwa ukhala ngobuningi kwabadlali esikwatini, wathi kuzokuba nzima ukuthi silawuleke. Akakufihli ukuthi uzoza noshintsho.
“Noma yikuphi lapho engifika khona ngifuna kubonakale ukuthi sengifikile, kube noshintsho. Kangisho (ushintsho) kwi-orlando Pirates kuphela kodwa eningizimu Afrika jikelele. Kuyihlazo ukuthi ikilabhu enkulu njengepirates kayinqobanga lutho ngesizini edlule okuyinto engehlanga kahle kubalandeli.
“Kodwa-ke ngokubambisana sizozama ukusijika lesi simo sibuyisele le kilabhu lapho kufanele ngabe ikhona. Kudala ngahamba lapha ekilabhini kodwa bengikulandela okwenzekayo ngibuka nemidlalo yayo eminingi.
"Abanye abadlali ngisebenzile nabo, abanye ngababukela kodwa okuningi kuzocaca kahle sengibabonela eduze njengoba sengizosebenza nabo,” kusho usredojevic.
Leli phephandaba lithole ukuthi ibucs imatasa yehla yenyuka izama ukutholela lo mqeqeshi incwadi emgunyaza ukusebenza kuleli ngokushesha.
Le kilabhu izovula isizini ngokubhekana nechippa United emdlalweni we-absa Premiership ozokuba ngomgqibelo womhla zili-19 kuncwaba (August) ekhaya e-orlando Stadium, esoweto ngo-18h00.
Isiyonke imidlalo yokuvula isizini yezi-2017/2018 ye-absa Premiership imi ngalolu hlobo:
NGOLWESIHLANU lomhla zili18 kuncwaba (August)
Ebidvest Stadium: Bidvest Wits vs Cape Town City FC 20h00.
NGOMGQIBELO womhla zili-19 kwephezulu
Elucas Moripe Stadium:
Supersport United vs Mamelodi Sundowns 15h00.
E-old Peter Mokaba Stadium:
Polokwane City vs Baroka FC 15h00.
Eking Zwelithini Stadium:
Amazulu FC vs Free State Stars 15h00.
E-orlando Stadium:
Orlando Pirates vs Chippa United 18h00.
Ecape Town Stadium:
Ajax Cape Town vs Golden Arrows 20h15.
NGESONTO mhla zingama-20
Efree State Stadium:
Bloemfontein Celtic vs Kaizer Chiefs 15h00.
Eroyal Bafokeng Stadium: Platinum Stars vs Maritzburg United 15h00.