KUYALIBHEDELA IQEMBU LEKWAITO
Badlelwe umuzi nezimoto
KUSHABALELE ubukhazikhazi nempilo ephezulu kumalunga eqembu idbn Nyts elishise izikhotha ngengoma ethi Shumaya.
Leli qembu elinamalunga ayisihlanu asethekwini abaziwa ukuthi aphila impilo ephezulu njengoba ebevamise ukuveza izimpahla zawo ezinkundleni zokuxhumana, okubalwa kuzo umuzi nezimoto zikanokusho.
ILANGA Langesonto lithole ukuthi sekunesikhathi ekhishiwe endlini kanokusho esemidrand, eningizimu yegoli abehlala kuyo amalunga aleli qembu. Ngaphezu kwalokho ababili kuleli qembu badlelwa izimoto. Leli phephandaba lithole ukuthi ngesikhathi bekhishwa kule ndlu, bafudukele esoweto, bampintsha komunye umngani wabo.
Ngokusho kwemithombo yaleli phephandaba engashayi eceleni, laba baxakwe yimali yerenti njengoba begcine bekhishiwe kule ndlu abebeyibiza ngewhite House.
Njengamanje kubikwa ukuthi bahlala eclearwater, okuyindawo abayitholelwe ngu-oskido njengoba beqopha ngaphansi kwenkampani yakhe ikalawa. Ngokusho komthombo, u-oskido ukhokhele izinyanga eziyisi-6 ukuba bahlale kule ndawo, wathi ngemuva kwalokho bazozibonela.
Imenenja yasekalawa u-arthur Mathenga odume ngelikabra Skoch ukuqinisekisile KWILANGA Langesonto ukuthi laba bakhishiwe ewhite House, nokuthi njengamanje bahlala eclearwater. Echaza ngesizathu sokuphuma kwabo uthe yingoba indlu ibisidayisa, kwase kuphoqa ukuba bathole enye indawo.
Nokho okushiwo nguskoch mayelana nokukhishwa kwalaba endlini kuyashayisana nokushiwo ngucebo Ngcobo oyilunga laleli qembu. Yena (ucebo) utshele intatheli YELANGA Langesonto ukuthi baphume ngoba indawo isincane, sebefuna indawo ethe xaxa, enamagumbi amaningana.
Ngokusho komthombo osonde- lene kakhulu naleli qembu, isimo sibi, ikati lilele eziko kulezi nsizwa, maningi amathuba okuthi zibuyele emakubo ethekwini. Lo mthombo uthi enye into elimaze laba wukuziphakamisa kuze kweqe.
Bagcine ukukhipha i-albhamu ngowezi-2015, ishumaya. Ngemuva kwalokho babuye ngesingili esihloko sithi "Siyabonga Mzansi" evele yazibandela nje, yangabashukumisa abalandeli. Le ngoma bebeyinyomule kuyo le-albhamu ishumaya. Baphinde baqhamuka nenye isingili enesihloko esithi "Kwamakhelwane". Yize noma ibe ngcono yona kodwa kayibafikisanga ndawo. Ekuqaleni kwalo nyaka basebenzisane nodj Bongz, engomeni yakhe (ubongz) ethi "Kuruza", nayo ayibonakali ibabuyisa ezinhliziyweni zabalandeli. Ngemuva kwe"kuruza", baphinde bapikwa nguye UDJ Bongz engomeni ethi "Impimpi" nayo ebonakala inganyakazisi ngisho ubhozo.
Ucebo utshele leli phephandaba ukuthi bazokhipha enye i-albhamu ngomandulo (September). Uskoch yena uthi asikathathwa isinqumo sokuthi izokhishwa yini le albhamu ngoba kusafanele iyolalelwa ngabaqondisi bomculo ekalawa.