Indalo iyisipho esihle sesidalwa esingumuntu
UMUNTU uyisidalwa esiyisimangaliso. Noma ngabe ukulolu hlangothi oluthi akekho unkulunkulu kodwa uma uke uzinike isikhathi ucubungule ukwakheka komuntu, bese ukuqhathanisa nezinye izidalwa, uyaye ubone ngokusobala ukuthi indalo yomhlaba, kanye nomuntu, konke kusohlelweni olunobungcweti obumangalisayo.
Indalo iyasifundisa ukuthi yahlelwa kahle futhi kwafakwa kuyo amandla okuziqhubekela, izikhulise, izandise, futhi izisimamise ngokwayo. Ukwakheka kwayo yonke indalo emhlabeni kanye nemvelo yayo, kuyizinkomba ezisobala zokuthi kukhona ukucabanga okungejwayelekile okwenze saba nakho konke lokhu esikubonayo, nokuhleleka kwakho. Ukudalwa komuntu, kuyafakazwa ezincwadini eziningi ezahlukene ukuthi kwandulelwe wukudalwa komhlaba nakho konke okukuwo ngoba kwakungeke kwenzeke umuntu adalwe ube ungekho umhlaba azophila kuwo, nomhlabathi azoma, ahlale, aphinde alale kuwo.
Kwakungeke kwenzeke kudalwe umuntu amanzi okumele aphile ngawo engekho.
Ukube amanzi ayengekho, ngabe asinazo izitshalo ezivunwa wukuba khona kwamanzi ukuze zimile, zisimame zikwazi nokukhula zigcine nazo sezithele izithelo. Amanzi ayikho konke ekuphileni komhlaba ngoba yiwona angumongo wokuphila kuzona izilwane, izitshalo kanjalo nabantu.
Usuyabona ukuthi ukudalwa kwamanzi (phakathi kwezinye izinto ezibalulekile), bekusho ukuthi zonke lezi zidalwa, zinobudlelwano obuthile ngoba nakhu sizibona zonke zihlanganyela emanzini.
Umuntu unikwe izinto eziyisimangaliso phezu kwayo yonke indalo. Unikwe amandla okubusa, alawule, ashaye imithetho yokuvikela nokuqinisekisa ukuthi yonke le ndalo yomhlaba iyaqhubeka iphile, futhi ayiphazanyiswa ekuphileni kwayo.
Ngiyazi ukuthi kaningi siyaye siyithathe kancane indaba yokuthi umuntu uthenjiwe ngokuvikela aphinde anakekele indalo yonke nemvelo esiyinikwe njengesipho esihle, ukuze sikwazi ukuqhubeka siphile, sihlale kahle, sidle kuyona futhi indalo le, sibuye sakhe izakhiwo ezinkulu ezihlobise umhlaba wethu, njengasemadolobheni amakhulu, kanjalo nasezikhungweni ezivelele emhlabeni wonke jikelele.
Umuntu unikwe ubuchopho obuyisimangaliso, ngoba bona bunamandla okukwazi ukucabanga, bubuye bube yisizinda sengqondo nokuyilapho kuzaleka khona imiqondo eyahlukene neyenza ukuphila kube yinto enhle nenezimangaliso ezisishiya simangele ngenxa yale ndalo enhle kangaka.
Umuntu unikwe amandla obukhosi phezu kwendalo, okusho ukuthi ukuvuka kwakhe ekuseni enanela ukuphuma kwelanga, nokuqala kosuku olusha, usuke enikwe ithuba eliyingqayizivele lokubusa nokusebenzisa amandla akhe obukhosi, kule mini asephinde wayinikwa futhi.
Ukuba sonke besiqonda ukuthi le ndaba yobukhosi ibaluleke kangakanani ngabe akekho umuntu oba nomona ngempumelelo yomunye futhi ngabe sonke sinomuzwa wobumbano nokwakha sihlanganyele, sisimamise umhlaba ngokubambisana nokwesekelana futhi sicule iculo elilodwa elithi singababusi kulo mhlaba.
Ubukhosi bethu phezu komhlaba bebubiza ukuba siphane inhlonipho ngokwazi ukuthi njengoba nginikwe isipho sobukhosi nje, nomunye umuntu ophilayo emhlabeni naye uphiwe isipho esifanayo. Zingane zakwethu ake sizihluphe ngokubuyisa isithunzi sethu sobukhosi, sihloniphane, sazisane, sakhane, sithandane, bese sihlalisana ngokuthula nothando.