Akazisoli u-edward Zuma ngakushilo
UKUXOLISA kukamnu Edward Zuma, oyindodana kamengameli wezwe umnu Jacob Zuma, kusishiya nombuzo wokuthi uxolisa ngoba ezisola ngempela, ebona iphutha lakhe noma uxolisa ngoba ephoqiwe na.
Sekuvamile ukuba abantu benze izinkulumo ezisusa uhlevane emphakathini, baqede lapho bese bethi bayaxolisa. Imvamisa baxolisa ngoba sekusuke umsindo, ngesinye isikhathi umuntu esesatshiswa ngokuthathelwa izinyathelo.
Naye umnu Zuma (Edward) siyazi ukuthi uxolise ngemuva kokuba i-african National Congress (ANC) ikhiphe umyalelo wokuba axolise ngencwadi evulelekile ayibhale wayibhekisa kumnu Pravin Gordhan, obenguNgqongqoshe wezezimali kuzwelonke, nomnu Derek Hanekom obengungqongqoshe wezokuvakasha kuzwelonke. Kuleyo ncwadi ubebagxibha umnu Gordhan nomnu Hanekom ebabiza ngabadayisi.
Asikholwa wukuthi umnu Zuma uphunyukile kukho konke abekusho kodwa sibona ukuthi ubeyazi into abeyisho futhi ezinike isikhathi wayicabanga. Manje-ke ukuxolisa kwakhe sikubona njengento engasho lutho.
Asiqondi ukuthi kwenza muphi umehluko ukuba umuntu akhulume izinto eziphoxa noma ezehlisa isithunzi sabanye abantu bese ephoqwa kuthiwe makaxolise.
Okokuqala nje, ukucela uxolo kufanele kusuke ngaphakathi kumuntu owonile uma esezisola kodwa uma ephoqwa ukuba axolisi akwakhi mqondo.
Yebo, kuyenzeka umuntu one engaqondile ngempela, njengokuphimisela igama elithile ezitshela ukuthi likahle kodwa bese lihlala kabi komunye. Ukuxolisa kwalowo muntu kuye kuzwakale futhi kwamukeleke.
Lo mkhuba-ke wokuba umuntu akhulume into esusa uhlevane emphakathini ivamile kosopolitiki nakulabo abaye bakhulume izinkulumo ezicwasa ngokwebala noma ngokobuhlanga. Baningi esingababala abakhulume izinkulumo ezicwasayo, ezithunuka amanxeba kwabanye abantu, kuthi lapho sekusuke umsindo, umuntu bese eshaya ungqimphothwe, axolise noma aphoqwe ukuba axolise.
Mhlawumbe kufanele abantu bakuqonde ukuthi ukuxolisa akupholisi silonda noma akumelaphi osuke elimele emoyeni kodwa kusuke kukhombisa nje ukuzisola komuntu.
Sibona ukuthi kufanele iyekwe le nto yokuphoqwa komuntu ukuba axolise kodwa ajeziswe ngesenzo sakhe. Lokho sikholwa wukuthi kuyonciphisa abantu abakhipha izinto ezibolile ngomlomo ngoba bazi ukuthi kakukho sijeziso abazosithola kodwa kuzothiwa mabaxolise nje kuphele kanjalo.