Ithemba lezinsuku zenjabulo kwibucs
Kudume u"hebe" usuthu lunqoba emlazi
I-ORLANDO Pirates ibuyise ithemba lenjabulo kubalandeli bayo ihlula ichippa United ngo-1-0 emdlalweni wayo wokuvula i-absa Premiership izolo ngomgqibelo kusihlwa e-orlando Stadium, esoweto.
Igoli okunqobe ngalo ibucs lingqofelwe enethini nguthamsanqa “Gandaganda” Gabuza ngomzuzu wama-37. Kulo mdlalo kucacile ukuthi uza nezinguquko umilutin “Micho” Sredojevic ongumqeqeshi omusha webucs. Uqale ngesikimu esihlukile emuva. Umicho umjabulise kakhulu lo mphumela njengoba ekholwa wukuthi uzobuyisa ukuzethemba kubadlali azwakalise ukuthi bekungasekho.
Ubophele untsikelelo Nyauza nogladwin Shitolo maphakathi nenkundla wase ebophela uthabo Matlaba ongukaputeni kwesokunxele no-innocent Maela kwesokudla. Umaela obebolekiswe kwithanda Royal Zulu ngesizini edlule, udlale ingcwenga yebhola futhi ube nesandla egolini likagabuza okwenze waqokwa njengomdlali wosuku. Bebengekho ngisho ebhentshini u-ayanda Gcaba nohappy Jele abasolwe kakhulu ngokuvuzisa amagoli alula ngesizini edlule.
Ezintini ibucs ibibophele uwayne Sandilands esanda kumsayinisa njengoba ebewukudla kwebhentshi kwimamelodi Sundowns. Umicho esiswini ufake umusa Nyatama nothami Sangweni abasanda kujoyina le kilabhu. Ibucs idlale ibhola elihlele- kile kulo mdlalo kodwa ibibuye ihluleke ukubhekana nengcindezi yechippa.
Isundowns ivulele isibhaxu kwisupersport United kuba ngu-2-0 kowe-absa Premiership izolo ngomgqibelo ntambama elucas Moripe Stadium, e-atteridgeville. Amagoli okunqobe ngawo idowns abhakuziswe enethini nguhlompho Kekana ngomzuzu wama-34 nothemba Zwane ngowama-51 kulo mdlalo obekutholene kuwo phezulu amakilabhu angomkhaya basepretoria. Isupersport United iqede lo mdlalo ingasaphelele kukhishwa ngekhadi elibomvu udean “Mlungu” Furman.
Amazulu FC abingelele kamnandi kwi-absa Premiership eguqisa ifree State Stars ngo-1-0 wephenathi eshaywe ngutapelo Nyongo yangqubuza ipali maqede yashaya emhlane kanozinti westars, u-ali Sangare, yase ikhalakathela enethini ngomzuzu wama-87 izolo ntambama eking Zwelithini Stadium, emlazi.
Usuthu ludlale ibhola elihle kulo mdlalo yize lugijime isikhathi eside lungasaphelele emuva kokuba kukhishwe ngekhadi elibomvu usadate Ouro-akoriko kusanda kuqala umdlalo. Nestars iqede umdlalo ingasaphelele kukhishwa usifiso Mbhele ngekhadi elibomvu seliyozilahla kunina. Lesi kube yisiqalo esihle kakhulu kucavin Johnson ocija usuthu.
Ipolokwane City ishayane yaze yabukana nebaroka FC kuba ngu-0-0 koweligi izolo ngomgqibelo e-old Peter Mokaba Stadium, elimpopo kanti icape Town City ihlule ibidvest Wits ngo-1-0 wegoli likalehlohonolo Majoro ngolwesihlanu egoli.