SELUYAZIWA USUKU LOMSHADO KA-MINNIE
Uzoshadela endaweni eyimfihlo
SEZIYAPHUMA izimemo zomshado omhlophe kasaziwayo ongumethuli wezinhlelo kumabonakude uminenhle “Minnie” Dlamini. Kulezi zimemo kuvela nosuku ozobe wenziwe ngalo nokuthi uzobe ukuliphi idolobha. ISITHOMBE: MZANSI ONLINE.CO.ZA
SELUPHUMILE usuku lomshado omhlophe kasaziwayo ongumethuli wezinhlelo uminenhle “Minnie” Dlamini, okulindeleke ukuba ube sezingeni eliphezulu, elizoshiya abaningi bewubabaza. ILANGA Langesonto lipotshozelwe
wumthombo walo osondelene kakhulu nezinhlelo zomshado wale ntokazi yasedurban North, ethekwini, ukuthi umshado uzobe ungomhlaka-16 kumandulo (September), kanti kuthiwa nezimemo seziyaphuma.
Ngokusho kwalo mthombo, le ndumezulu yomshado izobe isecape Town kodwa indawo lapho ozobe wenzelwe khona kayidaluliwe nakwizimemo.
Uminnie uzobe eshada noquinton Jones, ongumthwebuli wezithombe futhi onenkampani ekhiqiza izinhlelo zikamabonakude.
Kuyaziwa ukuthi indaba yalo mshado ikhulunyelwa phansi kanti kulindeleke nokuba ezokuphepha ziqine njengoba kuzobe kugcwele osaziwayo futhi uhanjelwe ngabakhe- thiweyo.
Kuzokhumbuleka ukuthi ngasekuqaleni kukantulikazi (July) kutheleke abakwajones, beyombesa kwaDlamini. Ngokusho komthombo ngalo lolo suku kwaqedelwa konke okuthinta amalobolo.
Nawo lo mcimbi ubuhanjelwe yizicukuthwane kanti nezokuphepha beziqiniswe kakhulu ngendlela yokuthi bekungavumeleke ngisho abathwebula izithombe bengagunyaziwe.
Unina kaminnie, uqueen Dlamini, uthe akavumelekile ukukhuluma akhiphe imininingwane kodwa ukuqinisekisile ukuthi umshado ukhona. Ube esecela ukunikwa ithuba athinte asondelene nabo ngenhloso yokuzwa ukuthi angaludalula yini usuku neminye imininingwane.
Nangesikhathi somembeso umndeni wawuwuhlaba inhlali ngendaba yomcimbi, ungafuni nhlobo ukuphawula. Kuke kwavela phambilini emithonjeni yabezindaba ukuthi imnet yiyona ethenge ilungelo lokuqopha nokusakaza lo mshado nazo zonke izinhlelo ezimayelana nawo. hlongwaj@ilanganews.co.za