I-DISTRUCTION BOYZ ENGXABANWENI KA-TIRA NOMAMPINTSHA
ZILOKHU ziqhubeke njalo izinsolo zokungezwani phakathi kukamandla Maphumulo odume ngelikamampintsha kwibig NUZ nomphathi wakhe umthokozi Khathi (UDJ Tira).
Sekungumlando ukuthi leli phephandaba libike zikhawu eziningana ngokungahoshelani okukhona phakathi kwalaba baculi.
Okokugcina esikubikile kube wukushiya phansi kukamampintsha umcimbi wenkampani yakhe obuseyadini Lounge ngemva kokutheleka kukadj Tira obengamenywanga, wagibela esteji wazenzela.
Ezakamuva ngezokushiya ewest Ink kwedistruction Boyz esibike ngakho kwilaNGA Letheku elinguzakwabo waleli ngolwesine esisuka kulo. Leli qembu elakhiwe ngamabhungu amabili uthobane Mgobhozi (Que) nozipho Mthembu (Goldmax) abaneminyaka engama-21, lishiye iwest Ink kamampintsha njengoba selinamathele kwiAfrotainment kadj Tira. Kuthiwa nakuba laba kade bevele besebenza notira kodwa ukushiya kwabo ngokugcwele ewest Ink sekuvele kwafana nokubhunyela uphalafini emlilweni kwingxabano katira nomampintsha.
Imithombo ehlukene ithi idistruction Boyz kayisapheli emzini katira, imatasa ne-albhamu katipcee wodumo lwengoma “Amadada”.
Ukuzimatatisa kwabo notira kuthiwa kuholele ekutheni umampintsha ayeke nokubakhokhela irenti yomuzi abebehlala kuwo eglenwood ethekwini bagcina bequba kwenye indawo yokuhlala ebingenayo nefenisha.
Phakathi kwezizathu ezivelayo ngokushiya kwabo wukuthi bebengasathokozile neze njengoba ubasi wabo (umampintsha) ebephoqelela ukuba bagxile emsebenzini kababes (Wodumo) kanti babevumelene ngokuthi nabo bazolekelelwa bazimele. Yinto engafihliwe ukuthi ubabes uyinsengwakazi kule nkampani kampintsho. Kuthiwa babone ukuhlala ewest Ink kubabambezela, banquma ukuphuma ngesango.
Ethintwa omunye wabo (Que), unxuse ukuba aqale abonisane nozakwabo ngobekubuzwa yintatheli. Uthi kakulona iqiniso ukuthi kabasasebenzisani newest Ink kodwa futhi wavuma ukuthi bayasebenzisana neAfrotainment.
“Uyazi brazo kuyimanje kunengoma esiyenze notipcee e-afro esitholakala kumaItunes, nodj Cndo sisebenzile naye khona e-afro. Ewest Ink namanje sisasebenza khona, umehluko wukuthi manje sesinengane yethu idistruction Boyz Records nesikhiphe kuyo le ngoma enotipcee.
Irenti umampintsha ubesikhokhela njalo, uze wayeka ngoba sesivumelene ngokuthi sesizozimela, siyazikhokhela manje. Inkinga eke yaba khona size sishintsha indawo yokuhlala yingoba bekunezikhalazo ngomsindo kanti umculo yiyona nto esiphila ngayo, hhayi ngoba bekungakhokhiwe,” usho kanje.
Phambilini UDJ Tira nomampintsha baziphikile izinsolo zokungezwani njengoba bekusolwa kakhulu umampintsha ngokugxila kubabes, ekhohlwa yiqembu adume kulo elenganyelwe ngutira ibig Nuz.
Utira uze wathumelela le ntatheli umyalezo ngaleso sikhathi othi “Ave nisiqhatha kodwa.”
zowakha@ilanganews.co.za