Ingozi yemishado-mbumbulu
OLIMINI lwesizulu kunesisho noma isaga esithi “uzenzile akakhalelwa kukhalelwa uzumekile”. Lolu wudaba engilubhala inhliziyo yami iqaqamba ngokubona abesifazane abayikhethelo lesizwe sethu kukhona phakathi kwabo abayengeka nangento esobala ukuthi iwukuphathwa emehlweni (wukukhohliswa) emini libalele saka.
Lesi sexwayiso siqhamuke ngesikhathi esihle, emuva kancane nje kokugoqwa kwenyanga yabesifazane esongwe ngolwesine. Umfundi akumele-ke ayithathe le ndaba njengengxenye yalowo mkhuhlane obizwa nge- xenophobia kodwa yisexwayiso esiphuthumayo engekho indlela yokusidlulisela kwabaqondene naso lingathintiwe igama elithi abokufika.
Uma kukhona okufanele asolwe ngalo monakalo yibo kanye abesifazane abangumsinsi wokuzimilela eningizimu Afrika. Lapha ngikhuluma ngomkhuba ongenisile kulezi zinsuku wemishado-mbumbulu, abesifazane bakithi abalutheka kalula babe yingxenye yayo bengazihluphanga ngokubuza ukuthi yisitimela esiya kuphi lesi.
Okungisuse phansi ngale nhlabamkhosi wuhlelo oluzwakale ngolwesine olwedlule kwesinye isiteshi esikhulukazi esisakaza ngolimi lwesingisi, imetro FM, lapho isimenywa bekuyiphini likangqongqoshe Wezasekhaya udkt Hlengiwe Mkhize ebenengxoxo nomsakazi wodumo waso unkk Criselda Dudumashe.
Bakubeke kwacaca kusuka phansi ukuthi isexwayiso lesi asikhona ukuhlasela abokufika kodwa siwukukhanyisela abesifazane ngobungozi bokuzigaxa kule mishado-mbumbulu nabantu abavela emazweni angaphandle.
Ubugebengu abunalo elinye igama okumele bubizwe ngalo, kanjalo nalesi senzo siwubugebengu ngisho owesifazane angazithethelela ngokuthi ubengazi. Kulolu hlelo kuvelile ukuthi sikhulu kakhulu isidingo sokuqwashisa abesifazane bakithi ngengozi yalokhu, ikakhulukazi intsha.
Bekuzwakala futhi ngabalaleli abebeshaya izingcingo bephawula. ILANGA Langesonto libone kufanele futhi kuyisibo- pho kulo ukuba nalo lifake isandla emshikashikeni wokuqwashisa abesifazane bakithi ngale ngwadla. Okokuqala okwenza abesifazane mhlawumbe bayithathe kalula le nto wukuthi kusuke kungekho kuthandana kwangempela kuleyo “mishado” kodwa yinto nje egcina emabhukwini. Maqondana nalelo phuzu nakhu okumele akukhumbule owesifazane ocabanga ukuthi kulula ukwenza le nto. Umazisi lona empeleni uyincwadi noma yisigqebhezana sikahulumeni ( official document) ewubufakazi bokuba ngobhalisiwe emqingweni oqukethe amagama azo zonke izakhamuzi zaleli zwe.
Ngisho nengane ezalwe izolo iba nenombolo kamazisi esitifiketini sayo sokuzalwa futhi osekuyoba ngeyayo unomphelo nalapho sekukhishwa umazisi wayo.
Kusho ukuthini lokhu? Kusho ukuthi umazisi uyingalo ( extension) yalowo mqingo wamagama ezakhamuzi ( population register) bese kuthi wena owunikeziwe ube ngumphathiswa wawo.
Njengoba umazisi uyincwadi noma isigqebhezana esiphethe impilo yakho muntu wesifazane, ukuzigaxelisa ezenzweni zenkohlakalo “yomshado” ube wazi ukuthi kawushadile, zikhombisa ukungakwazi ukubuka ebangeni elide ukuya phambili - ngisho kungathiwa ubuwethenjiswe izishaqane yilowo muntu othi yenzani lokhu kungcola. eyabanikezwa utshwala, hhawu kube usewele ngelibanzi likaphalatha kanjalo-ke owokufika.
Phela usethole ukuba yisakhamuzi kuleli nawo wonke amalungelo ahambisana nalokho. Owesifazane uzikhohlisa ngokuthi ngeke yaziwe muntu inkohlakalo ayenzile.
Dukuduku sivele isidingo sokuba ashade okwangempela nomuntu wakhona kuleli. Uyaqambe uyafika laphaya emahhovisi omnyango Wezasekhaya i- computer iveze ukuthi sewashada. Phela i- computer lena ayikhohlwa yilokho eyenziswe khona ngendlela eyalelwe ngayo.
Lapho-ke owesifazane sekuzofuneka athole leyo ndoda abenze nayo lo mkhonyovu ukuze benze isehlukaniso phela. Dololo, ziyime emthumeni manje ngoba mlisa ndini ngeke usavela, phela ingani uyazi ukuthi wephule umthetho.
Iqiniso ngomshado wukuthi uyisivumelwano esisemthethweni ongeke nje wenze yinoma yini ngawo. Abanye bagcina bengasakwazi nokungcwaba izihlobo ngoba sekuvela ukuthi babiza ezinye izibongo, abasasebenzisi lezi akade baziwa ngazo.
Uma sebethola abantwana kuye kungazeki ukuthi sebezobhaliswa kanjani. Umntwana uzithola esenenkinga yokuba afunde ngoba isitifiketi sokuzalwa esidingekayo kungelula ukusithola. na sikhombisa ukuthi siyisizwe esikhohlakele ngoba ngeke yenzeka le nto uma sonke sizokhuza umhlola kozoza kithina naleyo ngqondo yokubukela phansi isimilo sethu ngokuyengwa ngamakinati lawa izintombi zakithi eziluthwa ngawo.
Phakathi kokunye-ke okwakushiwo ngabalaleli ababeshaya izingcingo wukuthi abantu bahluphekile yingakho belutheka kalula kanjena. Iseluleko-ke sithi akuqali ngabo ukuhlupheka kwazise bakhona abahlupheka njengabo kepha abangayenzi le nto.
Abantu bakithi mabafunde ukuthi lowo okwenzisa le nto usuke ezicabangela yena siqu sakhe, engakhathali ngokuthi wena zinkinga zini akufaka kuzona ngokuvuma lo mkhonyovu. Futhi ukwenzisa lokhu ngoba ekholwa wukuthi abantu baseningizimu Afrika bayanuka phu yinkohlakalo okuthi ngokuyivuma kwabanye bethu le nto, bese kuba nobufakazi obuqinisa lesi sithombe abanaso ngathi.