UBETHANDA UKUHLALA EZINDLINI EZIDUME NGO 4 ROOM
NAMHLANJE sinethulela ingxenye yokugcina yempilo karev Nicholas Bhengu.
IMPILO YAKHE NOMNDENI
Umfu Bhengu uvela engumuntu onothando nobethokozile emshadweni wakhe nonkk Mylet Bhengu (umandlela).
Lokhu kugqama kahle emazwini alandelayo, angolimi lwesingisi awethula enkonzweni yomngcwabo womkakhe enkonzweni epietermaritzburg lapho naye agcina engcwatshwe khona eceleni komkakhe.
Lo myalezo wokuvalelisa kumkakhe uqukethe cishe konke ngohlobo lwempilo yabo emshadweni nasemsebenzini wenkosi. Lawo mazwi afundeka kanje:
AMAZWI OKUVALELISA KUMNGANI OSHONILE - Umylet Bhengu
Uqale kungekho lutho futhi ungaboni lutho phambili, Phambi kwakho bekungekho lutho futhi kokunye kwanotalagu; Ugwadule, indlala nokweswela kwakungukudla kwakho, Kodwa kuwena bekunomoya onganqobeki wokuphikelela, Kuwena bekunokuzimisela nokuqhubeka ubheke phambili,
Umhlobo wakho obemqondo wakhe wenziwe ngetshe lokokhela umlilo eligoqwe ngombani, Onhliziyo yakhe ibiyedlula eyebhubesi,
Ozimpondo zakhe zokukholwa zanqoba izinkunzi zasebhashan, Waphuza ogqozini lwakhe wabona imibono ekanye nawe. Wadela konke njengabrahama wasendulo.
Wena nomhlobo wakho nashiselwa ngomoya kankulunkulu, Yena nawe nenziwa naba munye ngesandla sikankulunkulu, Nobabili ningenalutho kuphela uthando nentando. Unkulunkulu wakho, umsindisi, umoya Ongcwele nebhayibheli lokunihola.
Lezi bekuyizikhali zenu nomthombo wamandla Isabelo senu bekungukwehliswa isithunzi, nokuvukelwa nobubha, Ukugula nakho kwanquma ukuhlasela wena kakhulu kunomhlobo wakho, Ukuzimisela nokukholwa kwakho ukukhulisa abantabakho ngokumesaba unkulunkulu, Nokusebenzela unkulunkulu useduze komyeni wakho, bekungukudla kwakho.
Seliyoshona ubone impumelelo engakaze ibe khona phambilini, E-afrika, lapho amadodana namadodakazi evuke othulini,
Aba yizakhamizi ezihloniphekile zakho kokubili izulu ne-afrika, Izintandane zaba odokotela, amanesi, othisha nabameli, Abefundisi bevangeli bavuke lapho kungekho lutho minyaka yonke .
Pho-ke, mhlobo wami weqiniso, ingilosi ibiyibala iminyaka yakho,
Kabili uhlangabezane nomopho onzima,
Ungazange wakhononda ukholo lwakho nentando yakho kwanxeshezelwa, Umthandazo oxutshwe nokunakekelwa konke kwaphumelela, Welulama wamenzela okuningi unkulunkulu nesintu.
Ukubala kokugcina kwafika, okuyisikhathi sesithathu sokuhlupheka,
Umkhuleko wezwakala emhlabeni wonke lapho igama lakho Belaziwa khona ngomhlobo wakho nangokusebenza kwakho ngothando,
Ulwazi lwesayensi yezokwelapha lwazanywa zikhathi zonke, Kodwa ingilosi ibisiqedile ukubala.
Ukusa kwangolwesithathu ngonhlaba zingama-26 ngowe 1971 Akusoze kwalibaleka nanini kuthina,
Lapho umhlobo wempilo yakho, umyeni nomsizi wakho enezinyembezi nokudumala,
Wasala kanjalo, engenathemba, esangene futhi edidekile, Uruth, nomvusi nedawn eceleni kwakhe
Besibekelwe yifu elimnyama losizi, nokushabalala kwamathemba.
Kodwa ikhwezi lokusa lavela enkosini yethu unkulunkulu, “Isithandwa senu asifile, sinihambele ngaphambili,
Nani iyabalwa imihla yenu, kungakabiphi nani nizolandela. Ngakho-ke thokozani, thokozani nezingilosi kweliphezulu, Ngokuba ubethanda futhi ekhonza inkosi aseye kuyo manje”.
Ngakho-ke lala, lala mhlobo wami othandekayo,
Lala okwesikhashana, Phumula ngoxolo esifubeni sothandiweyo wakho umsindisi, Huba kanye nathi futhi nathi sizohuba nawe, “INTOKOZO IFIKA EKUSENI” Maduze umhlobo wakho uzongena odwendweni olusemigwaqweni yegolide,
Yena usalile ukuba alungise amaphutha akhe, ahlele umsebenzi kankulunkulu.
ULALE KAHLE MYLET, ULALE KAHLE.
Lo myalezo wokuvalelisa kumkakhe uqukethe cishe konke ngohlobo lwempilo yabo emshadweni nasemsebenzini wenkosi. Manje ake sibuke kafushane ukuthi umfu Nicholas Bhengu ubezibona engumuntu onjani emphakathini nase-mpilweni jikelele.
Abantwana bakhe bathi wayekholelwa ekuthini azihlalele nabantu ezindlini zikamasipala ezidume ngelika-4 room ngoba ethi akathandi ukuqhelelana nabantu asebenza phakathi kwabo, okuyinto eyehluke kakhulu kwesikubona kubefundisi banamuhla.
Bathi nendlu yakhe esemanzimtoti wayakha kamuva eselungisela umhlalaphansi. Umfu Nicholas Bhengu ushone mhla ziyi-17 kuMfumfu 1985 eneminyaka engama-76.