Ukhamba lufuze imbiza kwazuma
ISISHO sesizulu esithi ' ukhamba lufuze imbiza' siwuhlala siwuthi ne umndeni kamengameli weningizimu Afrika, umnu Jacob Gedley'hlekisa Zuma, ikakhulukazi uma kubhekwa amadodana akhe amabili okungududuzani no-edward.
Komangalayo ukuthi lokhu sikususelaphi, okokuqala, ngolwesihlanu kuphume umbiko wokuthi intatheli yebritish Broadcasting Corporation (BBC) kodwa ezinze kuleli, umilton Nkosi, ivakashele kwelasedubai ngenhloso yokuyohlangana nendodana kamengameli Zuma, ududuzani, edume ngokuba sephaketheni lezimpunyela zomndeni wabomdabu basendiya osolwango ngokubamba umbuso wakuleli ngobhongwane, amagupta. Njengoba nomengameli uzuma waphika wama ngentaba ephalamende eminyakeni edlule ukuthi umuzi wakhe osenkandla wakhiwa ngemali yabakhokhi bentela - ezeseka ngokuthi imali yokuwakha uyiboleke ebhange nosekungumlando ukuthi le mali ugcine ephoqwe yinkantolo yomthethosisekelo ukuba ayikhokhe ngemuva kombiko womvikeli womphakathi - nendodana yakhe ududuzani iphike yahlanza ekudle ngayizolo ukuthi yona inefulethi elithengile elibiza izigidigidi zamarandi ebhilidini labadla izambane likapondo edubai elibizwa ngokuthi yiburj Khalifa. Nakuba imibiko evezwe wuhide lwama-email oselwaziwa ngeleguptaleaks iveze ubufakazi obuqanda ikhanda bokuthi ngempela ududuzani ulithengile leli fulethi elekelelwa abakwagupta, umfo kamsholozi uphika uma ngentaba ukuthi yena unefulethi edubai. Ngaphezu kwalokho uphika nokuthi kukhona isithabathaba somuzi esithengwe ngamagupta okusolwa ukuthi abesithengela uyise umengameli uzuma kulo leliya lizwe. Uphika nokuthi amagupta ansondo anawo umuzi edubai nakuba ubufakazi balokho bugcwele lonke izwe leli.
Indaba yesibili ngeka-edward obonakale kwivideo egcwele ezinkundleni zokuxhumana ephazamisa umhlangano obekukhuluma kuwona obengungqongqoshe wezimali kuleli umnu Pravin Gordhan emgungundlovu ngesonto eledlule.
Lapha umfo kazuma ukhombisa ubuqaba nokungazihloniphi okwesabekayo ngokuthemeleza emhlanganweni ephazamisa izikhulumi. Kule video u-edward ubonakala ememeza umnu Gordan ethi: "unamanga..." esho elandelisa nangamanye amazwi.
Okwenza sibone ukuthi ngempela baqinisile uma bethi ufuzo luyadlulela yindlela lezi zinsizwa ezimbili ezikubona kulula ngayo ukuma phambi kwamehlo omphakathi ziphike izinto ezisobala ngaphandle kokuveza ubufakazi njengoba sivame ukubona umsholozi ema phambi kwephalamende ephika izinto umphakathi onobufakazi ngazo njengayo eyomuzi wasenkandla. Ududuzani uphika eyokuba nefulethi eburj Khalifa nje, imibiko evele ngama-email aziwa ngeguptaleaks ikhomba inombolo yefulethi ngisho nesamba semali nosuku elithengwe ngayo leli fulethi. Kungaba kuhle ukuthi izinsizwa zakwazuma zikukhumbule ukuthi abantu baleli zwe banamehlo nezindlebe, bayakwazi ukubona, ukulalela nokuzicabangela bona ngokwabo. Kungenzeka ukuthi iningi aliyiqondi ipolitiki kodwa akekho ongazi ukuthi ezwakala kangcono amanga esekwa wubufakazi obuthile ukunamanga angesekwa ngalutho.
Ngelinye ilanga kuyofanele mhla behlela ukufunza umphakathi wakuleli amanga baqinisekise ukuthi okungenani bayawageza mbijana ukuze angalumeli.