OWEMABALA NOISE UNIKELE NGEKHEKHE LAKHE LOMSHADO EZAGUGENI
BENZE okungajwayelekile ureggie nobeauty Nkabinde ngesikhathi benikela ngekhekhe labo lomshado ezinhlanganweni zemiphakathi emalangeni, ogwini olusenyakatho yekwazulu Natal.
Ureggie, owumphathi wezimali kwi-african National Congress Youth League (ANCYL) abuye abe ngumnikazi wenkampani imabala Noise, ubeshada nobeauty ngempelasonto edlule base benquma ukuba ikhekhe labo eliyizitezi eziyisi-9 lingadliwa emshadweni, banikela ngalo ezikhungweni zabantu abadala nasekhaya lezintandane.
Leli khekhe, elibizwa ngokuthi yicastle Royal Cake, njengoba linezitezi eziyisi-9 limele iminyaka eyisi-9 lezi zithandani zindawonye, kanti ngesikhathi eyonikela ngalo belihambisana negilosa.
Umcimbi wokunikezela ngekhekhe ubusehholo lomphakathi emalangeni. Ubuhanjelwe yisekela lemeya kumasipala umdoni, unkk Sbongile Khathi.
Umnu Nkabinde ethula eyakhe inkulumo uthe: “Ngibonga kakhulu ukubona abantu abadala behlangene lapha bezokwamukela isipho engizobapha sona. Njengoba nazi, bengishadelwa ngempelasonto. Sithathe isinqumo sokuba ikhekhe sililethe lapha kinina.
“Kusukela namhlanje, yonke iminyaka sizokwenza imizamo yokuba silethe izipho lapha ikakhulukazi ezalukazini ngokhisimusi. Nginenhlangano okuthiwa yiremember Your Root okuhumusheka ngokuthi khumbula lapho uqhamuka khona,” kusho yena.
Ubeauty naye ushaye ngamafuphi, wathi: “Ngisazocela kubaba wekhaya ukuba njalo ngonyaka silugubhe la usuku lwethu lomshado.”
Uthandi Theorine Gumede (62), ongusihlalo wesiyabonga Senior Citizen, ubonge kakhulu umndeni wakwankabinde ngesipho sekhekhe ebesihambisana negilosa wathi: “Sibonga asiphezi, sengathi unkulunkulu anganikhulisa nibe wumndeni omkhulu.”
hlongwaj@ilanganews.co.za