ESKHALENI:
KONAKELE ezimpandeni kunobhutshuzwayo waseNingizimu Afrika okuyinto eholela ekutheni ibafana Bafana iphenduke inhlekisa e-afrika nasemhlabeni jikelele.
Ibafana sekukaningi iphula izinhliziyo zabathandi bebhola baseNingizimu Afrika. Nami ngingomunye wabebebona sizozicoshela amaphuzu ayisithupha kwicape Verde Island emilenzeni emibili yokuhlungela indebe yomhlaba ezokuba serussia ngonyaka ozayo. Hhayi ngoba ibukelwa phansi icape Verde kodwa bekungekho emqondweni ukuthi ingahlulwa yiburkina Faso nesenegal kwemibili yokuvula futhi ingashayi ngisho igoli elilodwa bese izokwehlula ibafana.
Kuyihlazo ukuthi iningizimu Afrika enabantu ababalelwa kwizi45 million ingahlulwa yicape Verde enabantu ababalelwa kwizi-500 000.
Umdlali obhubhise ibafana, ugarry Rodrigues, ukubeke kwacaca ukuthi inkinga yethu wukuthi sizitshela ukuthi sisezingeni elingcono ngoba nakhu sinengqalasizinda yezinga eliphezulu.
Emazweni amaningi ase-afrika abadlali bayiswa emazweni aphesheya besebancane ngeminyaka yobudala ngenxa yokuntuleka kwengqalasizinda esezingeni lomhlaba nobumqoka bokuthi babuye nolwazi olujulile emazweni abo.
Okubi-ke ngathi wukuthi ngisho leyo nkeshezana edlala phesheya kayinikwa ithuba kwibafana engicabanga ukuthi kwenziwa wukuthi kwesinye isikhathi iyahluleka ukuthatha imiyalelo ephuphile yabaqeqeshi abangazihluphi ngokufunda ulwazi olusha lwebhola.
Ngiyafisa ukwazi ukuthi kuyofika nini ezikhulwini zesouth African Football Association (Safa) ukuqonda ubumqoka bezinhlaka zokuthuthukiswa kwebhola.
Lokhu ngikusho ngoba into ehamba phambili ngisho kumalocal Football Associations (LFA) yimibango yamandla okuphazamisa ngisho imidlalo yama-zone. Imidlalo YESAB League ikhungethwe yizinkinga kwesinye isikhathi ezingathinti ukudlalwa kwebhola, kodwa ezibangwa wukulobizela izikhundla kwabathile.