KWETHULWE INYANGA YEZOKUVAKASHA
IGCINE yethulwe ngokusemthethweni ngaphandle kukangqongqoshe umnu Sihle Zikalala inyanga yezokuvasha Kwazulu Natal emcimbini obusevulintaba Country Estate, enewcastle, maphakathi nesifundazwe ngolwesihlanu. Umnu Zikalala ongungqongqo-she wezokuthuthukiswa komnotho, ezokuvakasha nezemvelo bekulindeleke ukuba abe yingxenye yalo mcimbi kwazise ubezoba yisikhulumi sosuku. ILANGA langesonto lihabule umoya wokuthi umnu Zikalala obuye abengusihlalo wenhlangano ebusayo esifundazweni i-african National Congress (ANC) uphoqeleke ukuba ahambele umhlangano ophuthumayo nesigungu esiphezulu ekomkhulu layo eluthuli House, egoli.
Lo mhlangano uqhamuka ngemuva kwesinqumo senkantolo ephakeme yasemgungundlovu ngolwesibili echaze ingqungquthela okuqokwe kuyo Umnu Zikalala njengebingekho emthethweni.
Kule ngqungquthela ebingolwezi wezi2015 umnu Zikalala wehlule umnu Senzo Mchunu obengusihlalo waleli qembu ngaphambi kwayo.
Nakuba umnu Zikalala ebengekho emcimbini obusenewcastle kodwa uqhubeke njengoba bekuhleliwe. Umnu Nhlakanipho Ntombela oyilungu lesishayamthetho Kwazulu Natal wethule inkulumo kanti uphinde waxolisela nomnu Zikalala ngokungakwazi ukuphumelela ekubeni yingxenye yalo mcimbi. Ukhuthaze izicukuthwane ebezihambele lo mcimbi ukuthi zazi ngezokuvakasha ezikhona esifundazweni.
Kulo mcimbi abasakazi begagasi FM abasanda kuwujoyina lo msakazo usphectacular nonaives bamenyezelwe njengamanxusa ezokuvakasha esifundazweni.
Ibamba lesikhulu esiphezulu kwitourism Kwazulu-natal unksz Phindile Makwakwa uthe kulo nyaka bazimisele ukukhuthaza kakhulu ukuba abantu bakulesi sifundazwe bazi ngezindawo ezikhona zokuvakasha Kwazulu Natal.
Uthe inhloso yokuqoka laba basakazi njengamanxusa wukuthi banabalandeli ezinkundleni zokuxhumana futhi banamagama kulo mkhakha.
Inkulumo yosuku yethulwe yimeya yasemajuba ukhansela Musa Ngubane. Uthe bayajabula ngokuthi lo mcimbi wenzelwe kule ndawo futhi bayaziqhenya ngezindawo abanazo ngaphansi kwalo mkhandlu.