UHLASELWE NGUSOMATEKISI OWEZINKULUMO EZAKHAYO
UHLANGANE nezimbila zithutha ebheke ezindlini zokusakaza kwasouth African Broadcasting Corporation (SABC) ethekwini owezinkulumo ezikhuthazayo ngesonto ehlaselwa ngumshayeli wetekisi.
Umnu Nkululeko Khanyi uthi uyoyixoxela amagwababa echobana into emehlele ngaserenki yamatekisi edumile ethekwini, ichesterville Rank, ephahlazelwa imoto engazelele.
Uthi bebebathathu emotweni kwehla lesi simanga ehlaselwa beyolanda umhlobo wabo obebalinde eduze kwale renki. Ubehamba nomnu Sanele Gumede beyolanda lo mhlobo wabo ngokomsebenzi.
“Sithe sesimthathile kwacaca ukuthi akusukeki ngoba lo mshayeli okuthiwa ngushaka igama lakhe ubepake phambi kwami. Ngimshayele amalambu ukuze angidedele kwabe sengonile. Ukhiphe isandla engikhombisa ukuthi mangigudle ngakwesokudla nobekungeke kwenzeke ngoba inkulu imoto ebengihamba ngayo.
“Angazi-ke kube sekwenzekani, wabe esephahlaze ifasitela langaphambili ngasohlangothini lo mgibeli. Ngivele ngoma, ngixakekile, bazama ukulawula isimo laba ebengihamba nabo ngoba bediniwe kodwa kwanhlanga zimuka nomoya, wangena emotweni wazihambela.
“Into nje engikwaze ukuyenza wukumshutha ngoba obekuphambili kimina wukufinyelela emsakazweni ngenze obekumele ngiyokwenza ohlelweni Unkulunkulu Nomuntu Omusha. Bathe uma sesihamba laba ababili ebenginabo babuza ukuthi ngibonile na ukuthi imoto uyipoqoze kanjani nebe- ngingabonanga nokuthi ukwenze nini.
“Ungisize kakhulu u-ayanda Msweli nabanye abasebenzi emsakazweni ngokuba ngikwazi ukuyovula icala. Namanje engisafisa ukukwazi wukuthi beyibulawelani imoto yami benza inhlekisa ngokuthi ifunani imoto yasegoli erenki yasethekwini kanti abazi ukuthi nami ngingowakhona la.
“Nomseshi wecala usibisi wenze umsebenzi oncomekayo njengoba ebengazisa ngokuqhubekayo njengoba ekwazile nokuthola umnikazi wetekisi. Okubi nje wukuthi ushaka lo kuthiwa akasatholakali ngoba wavele wayoshiya imoto kumnikazi wayo uma esezwile ukuthi usosesheni uthi uzomhlawulisa.
No- rank manager okuthiwe nguphilani ulekelele kakhulu ekutholakaleni komnikazi wetekisi,” kusho ukhanyi. Icala ulivule esiteshini samaphoyisa esisenkabeni yetheku. Ucolonel Thembeka Mbhele ukuqinisekisile ukuvulwa kwaleli cala kanti usibisi unqabile ukudedela imininingwane yomnikazi wetekisi nokuphawula nje ngophenyo.
zowakha@ilanganews.co.za