UMPHATHI USHAYE UMHLENGIKAZI
Kusize ukufika kozakwabo umphathi ebambe ngobhongwane umhlengikazi emtholampilo ongaphansi kwesibhedlela sikahulumeni esisengwavuma enyakatho-mpumalanga yekwazulu-natal ngemuva kokuba kuqubuke ingxabano yokungezwani ngamazwi.
Unkk Gugu Mdluli ongowokudabuka ophongolo ongumphathi wase-gateway Clinic uyamaniswa nezinsolo zokushaya alimaze kabuhlungu unkz Nonkululeko Makhaza ngezithuba zasekuseni ngolwesibili. Kuthiwa lesi sigameko siphazamise ukusebenza njengoba ingxenye yabasebenzi ilahle phansi amathuluzi neziguli ebe zifuna usizo zaqoka ukushiya phansi.
Ngolwesithathu ILANGA Langesonto linikele kulesi sibhedlela nokuyilapho khona lixoxisane nengxenye yabahlengikazi abazwakalise ukuthi sekufike lapho bekhathala khona ngempatho engeyinhle abayithola kulo mphathi. Isigameko sangoLwesibili sethuse abaningi njengoba kugcine sekuphoqeleka ukuba kubanjwe inguyazana yokuzama ukudambisa isimo.
Abasebenzi bakhala ngokuthi kudala lo mphathi esonga ngokuthi uzovulela isibhaxu engxenyeni yabasebenzi abangafuni ukwenza intando yakhe. Ngokusho kwabazibonele kwenzeka bathi bezwe ngomsindo wowesifazane ekhala ecela ukulekelelwa.
“Sizwe ukuqhuma kwempama nesibhakela. Sathi ukulinda kancane emuva kwalokho kwezwakala izwi lowesifazane enxusa ukuba asizwe ethi uyafa. Uma sivela emnyango sithola ukuthi umphathi ubambe uzakwethu ngobhongwane esho ukumkhipha umphefumulo.
Siyafisa ukuba umnyango ungenelele kulolu daba ngoba lomphathi ufuna senze intando yakhe nalapho khona efuna sifeze izinhloso zakhe. Usihlasela ngisho nasezindlini eyosithethisa,” kusho abasebenzi.
Batshele ILANGA Langesonto ukuthi ubabiza ngezidomu izinto ezingafundile. Leli phephandaba lilalele ezinye zezinkulumo eziqoshwe ngomakhalekhukhwini lapho khona kuzwakala lo mphathi echukuluza unkz Makhaza embiza ngesalukazi esingawazi umsebenzi.
Phakathi kokunye bathi ubangenela ngisho nasemiqashweni abahlala kuyo eyobaqulisa amacala namaphutha abawenza emsebenzini. Kuthiwa uhlala esonga ngokuthi kuzony..... maqede angabe esaqhubeka nokunye. Laba basebenzi bacele ukuba kugodlwe amagama abo ngoba besabela ukuthi bangase bazithole sebephelelwa wumsebenzi.
“Siyacela ukuba ningasilokothi nisidalule amagama ngoba singaxoshwa siphelelwe wumsebenzi. Sike sezwa ukuthi lomphathi uthi akamthandi uzakwethu futhi ufuna axoshwe,” kusho bona. ILANGA Langesonto lifice engekho emsebenzini unkz Makhaza ngenxa yezinhlungu. Uthe ubone kungcono ukuba avule icala ngoba yena uyakholelwa emthethweni.
“Ungehlise isithunzi lomama. Ungishaye kabuhlungu wangilimaza,” kusho yena. Leli phephendaba lifike ekhona emsebenzini unkk Mdluli nokuthe emuva kwesikhashana kwathiwa akasekho uyobamba umhlangano. Leli phephandaba lixhumana naye uthe nakuba luyiqiniso lolu daba kodwa ngeke aphawule lutho ngalo.
“Mina angiyena umuntu okhulumela umnyango nesibhedlela ngizocela ukuba uxhumane nabafanele uhlukane nami. Angikhulumi zindaba. Lona lukhona futhi lwenzekile udaba olunjalo,” esho egaklaza ucingo.
Okhulumela amaphoyisa Kwazulu-natal ult Colonel Thulani Zwane uthe kuvulwe icala lokushaya elenzeke endaweni yomsebenzi. Uthe liphenywa esiteshini samaphoyisa asengwavuma.
“Kuvulwe icala lokushaya nokwehlisa isithunzi somuntu emsebenzini. Amaphoyisa esiteshi saseNgwavuma amatasa nophenyo. Akukaboshwa muntu maqondana nalesi sigameko,” kuphetha uzwane. Okhulumela umnyango wezempilo KwaZulu-natal umnu Samuel Mkhwanazi uthe kuphambene nomthetho womnyango ukulwa kwabasebenzi endaweni yomsebenzi.
Uthe bazothathelwa izinyathelo futhi ezingaholela ekutheni baxoshwe.
“Ngokolwazi esinalo kube khona ukungaboni ngaso linye baze babekana izandla. Kuyicala ukulwa emsebenzini. Abenza lokho bangajeziswa nokujeziswa kabuhlungu futhi baxoshwe nasemsebenzini,” kusho umnu Mkhwanazi.