EZENKOLO: Abazalwane bangagxambukeli emshadweni
NAMUHLA sizobheka kafushane indaba yomshado emabandleni kulesi sikhathi. Esizokhululana kukho namuhla wukuthi njengoba umshado uyisipho, akudingeki kube negcindezi ngokwenzeka kwawo, ikakhulukazi ukuthi umuntu usithole esengakanani ubudala isibusiso somshado.
Lena yinselelo evama ukukhathaza abesifazane nokuze kugcine sebebizwa ngamagama ayizici ezibangela ingcindezi engenasidingo, leyo ngcindezi ifakwa kubona ngabanye abantu besifazane.
Isibonelo nje: “ukuqeda ikhalenda” - uma kushiwo kosevile eminya-keni yobudala engama-30; “ozenda zamshiya” uma lowo esedlulwa nayilabo abangemuva kwakhe ngokuzalwa; nokunye okuningi.
Indaba kalabani owayegebenga ujakobe emnikeza uleah okungesiyena ujakobe abemthanda waze wamsebenzela leyo minyaka eyisi7.
Nakuba kwakuyisenzo sobuqili kwezengcebo, kodwa isizathu sikaLabani sasithi ezweni lakhona akwenziwa ukuba omncane endiswe kuqala kunomdala.
Okungukuthi lokhu yindaba endala.
Umbuzo-ke uthi njengoba kungaveli ukuthi unkulunkulu wayekushilo yini lokho, kusobala ukuthi ulabani wayedlala ngaye ujakobe.
Nencazelo yamagama amadodana kaleah iyakuveza ukuthi wayesemshadweni angathandwa kuwo.
Mhlawumbe-ke lokhu singakuletha esikhathini sanamuhla lapho izintombi ezinhle emabandleni zizithola sezinengcindezi engenaso isidingo, kokunye kuze kwakhe- ke imishado okungena siqinise k o ukuthi inaso yini isigxivizo sikaNkulunkulu, sisho isibusiso phela.
Ingasaphathwa-ke eyokuthi kazi injabulo yona izoba khona yini emshadweni okungenwe kuwo ngoba kwenzelwa ukuthi “abantu bazothini”.
Ukuxoxisana ngendaba yothando lomshado phakathi kwentombi nensizwa, kuthi uma bemukelana ngemimoya bese bengena emshadweni, akusiyona into yakwasathane.
Ngakho-ke ukungena kwabakhokheli nawomama-mfundisi kumbe abaphostolikazi endabeni yabantu ababili iyinkinga.
Kuningi okunye okuyizinkinga izintombi ezizithola sezingene kukho ngenxa yokuzizwa sengathi sezishiywe yisitimela esiya ezweni lesithembiso “kwamshado” igama lakhona.
Babodwa abagcina sebehamba “kubathandazi” nezinyanga bethi balungisa izinto zabo.
Imishado eyakheke ngaleyo ndlela ayize ingaba nakho ukuthokoza kwazise kusuke kuphoqwa isimo.
Bekungaba kuhle-ke ukuba izintombi zakithi ziqaphele ukuthi okokuqala umshado lona uyisipho esivela kumdali okungamele siphoqwe. Okwesibili ukuwucela kunkulunkulu umshado akusilona ihlazo kumbe uphawu lokuthanda amadoda kakhulu.
Okwesithathu ubuhlungu bomzwangedwa obukufikelayo lapho ubona abanye bebambene ngocikicane beqhuba izinqola bethenga ezitolo ezinkulu, buncane kabi uma buqhathaniswa nosizi lomshado lapho kucace bha ukuthi labo abashadile banezimilo nezindlela zokuphila ezingafani okwempela futhi okungekho nelincane ithuba lokuthi bayoke bashaye ngalunyawo lunye bebheke phambili kulolu hambo lwempilo yabo.
Okokugcina, uma icebo likankulunkulu ngawe lingakuphathele umshado, lokho akusho ukuthi lelo cebo alikho. Kuningi futhi okungakulethela intokozo evangelini ngisho ungasitholanga isipho sokuzitholela umshado. Ngakho-ke kusemqoka ukuba umuntu azithokozise ngonkulunkulu ngoba Yena uyamenzela umuntu lokho okuyizifiso zenhliziyo yakhe: Ihubo 37:4.
MASIWUCELE KUNKULUNKULU UMSHADO