UMZUNGEZO WABANQOBE KWI-THE VOICE
BAZOZUNGEZA iningizimu Africa yonke bekhangisa ngamakhono abo omculo abanqoba nalabo abafinyelela kowamanqamu emncintiswaneni womculo ithe Voice South Africa ebeyenziwa ihlandla lesibili kulo nyaka.
Lo mncintiswano womculo, okhonjiswa esiteshini sikamabonakude imnet ngaphansi kwedstv, uzohambela cishe zonke izifundazwe zaseningizimu Africa okungenye yezindlela zokukhangisa ngalo mncintiswano nokubonisa abantu ukuthi kusuke kukhulunywa ngethalente elinjani uma kukhulunywa ngethe Voice SA.
Kuzokhumbuleka ukuthi ngesizini ephelile kunqobe ibhungu elingucraig Lucas. Le nsizwa izobe ihambisana nalabo ebashaye emakhanda lapho bekhangisa ngamazwi nethalente labo kanti kulokhu bazophinde bathole nethuba lokukhangisa ngomsebenzi asebewenzile selokhu bengenile endimeni yomculo.
Lo mzungezo uzohlanganisa okubalwa kubo ujosh Ansley ophume isibili kulo mncintiswano, ucaroline Grace obethandwa kakhulu ebizwa ngeQueen of Hearts.
Umcimbi uzobe uphethwe ngufatman ozakhele udumo kakhulu ngokuba yindoda engazenyezi ngobukhulu bayo kanti uthandwe kakhulu ngabalandeli beqala ukuqaphela ukuthi uthanda ukugqoka isigqoko esimhlophe esikhulu.
Yize lo mnncintiswano ungenalo idumela elikhulu kangako uma uwuqhathanisa ne-idols kodwa nawo kukhona ukukhula okubonayo njengoba kunabantu abafana notender Mavundla osebe ngumculi isikhathi eside, engenela lo mncintiswano futhi eyibamba ishisa kuze kube sekupheleni.
I-the Voice izakhele igama elihle ikakhulukazi kulabo abasuke bechithwe emncintiswaneni oshisa izikho- tha kulezi zinsuku, i-idols. Phela lapha kuya ngokuthi unawo yini amandla okuthola imnet ukuze ukwazi ukubuka lo mncintiswano womculo ngoba uma ungenayo kuvele kubhede ngempela udunyelwa uma kukhulunywa ngethe Voice.
Umzungezo wethe Voice uzoba nezinhlelo ezahlukene kanti uzobizwa ngethe Voice SA Reunited.
Ezinye izinsuku zimi kanje: mhla zili17 kuyiwa ebarnyard Theatre ecresta, 21 kuyiwa ethe Lyric Theare egold Reef Casino, mhla zingama- 23 kuyiwe ebarnyard Theatre erivonia bese kuthi mhla zingama-24 kudlulelwe ebarnyard ecasterbridge ewhite River.
Zonke lezi zinsuku zizobe zikuyona le nyanga ephezulu. Kuyothi uma kuvulwa ngomfumfu (October) kuqalwe egoldfields Casino ewelkom kanti uyoze uvalwe mhla zili-11 kulwezi (November) ediemersfontein ewellington. Yize yonke le mcimbi izobe ihambela izindawo zabadla izambane likapondo kodwa okuzofike kujabulise abantu wukwazi ukuthi abaqophi nabaphathi balo mncintiswano bahleli besethubeni lokuthola umuntu omusha noma labo abasuke bekhafulwe yingwenya ye-idols SA, phela lapho yikhona la kungadlalwa nhlobo kodwa kufuneka wazi ukuthi yini oyizele emculweni.