MAKUPHENYWE IZIBHAMU EZIPHATHWA NGABAQAPHI BABAHOLI
MHLELI: Kwelakho elihamba phambili bengicela ungiphe isikhala ekhasini lakho lemibono ngisike elijikayo ngokungenami kakhulu ngendaba yohlobo lwesibhamu esitholakale siphethwe yilabo ebebengabaqaphi bomholi kakhongolose ethekwini. Ngithi angikusho ukuthi kunzima kakhulu ukuba sivele sikhohlwe ukuthi yilesi kuphela isibhamu esikhona salolu hlobo, ngakhoke sifisa kubekhona uphenyo oluzoveza ngokuphelele ukuthi bonke abaqaphi baphethe izibhamu okufanelekile na ukuba baziphathe.
Kusiphatha kabi kakhulu lokhu esikubonile kule vidiyo kanye nenkulumo yabo ukuthi ngabe ibibhekiswe kubani. Okwenza sinyukelwe ngamaphaphu ngale ndaba ukuthi sezibeningi izigameko zokufa kwabantu kanye nabaholi kodwa kunabantu abatholakala nalolu hlobo lwesibhamu okwazeka ukuthi kaluvumelekile kuleli.
Njengeqembu lenkatha ethekwini sifisa kube khona uphenyo olunzulu ngisho nakuye umholi, unobhala wethekwini ubheki Ntuli KU-ANC ebekade bemqaphile, ukuthi kuba kanjani yena agadwe ngabantu abaphatha izibhamu zalolu hlobo. Okunye esifisa ukukwazi ukuthi kanti ukugadwa sekuqala kusiphi isigaba sobuholi ngoba lokhu sikubona kungukumosha imali yabakhokhi intela ukuthi sekuzogadwa noma ubani.
Lezi bhamu kufanele ziphenywe ukubona ukuthi kakukho yini lapho zibandanyeka khona ekubulaweni kwabantu nokuthi zifike kanjani. Okunye kufanele kube khona uphenyo oluzophenya bonke abaqaphi noma ngabe abaqapha abaholi ukuqinisekisa ukuthi abantu kakukho ukukhohlakala abakwenzayo. Lokhu kusenza sicabange nokuthi kusho ukuthi bakhona nabanye abaqaphi beANC abaphatha izibhamu ezingavumelekile kodwa bazifihlile.