Uzimisele ngokuguqula isimo unozinti we-arsenal
UTHEMBISA ukuguqula isimo esibi upetr Cech ongunozinti weArsenal eqhathwe nechelsea kowe-english Premiership namuhla ngesonto ngo-14h30 elondon, e-england.
Ichelsea eyizingqwele zepremiership, ihlale izenzela umathanda kwi-arsenal njengoba emidlalweni eyisihlanu emikhulu yakamuva ithole induku estamford Bridge okuyikomkhulu lechelsea.
Ucech uhlale isikhathi eside kwichelsea ngaphambi kokujoyina i-arsenal elolongwa nguArsene Wenger wasefrance. Lo nozinti uthi banethuba lokushintsha isimo.
“Ichelsea sidlale nayo kwicommunity Shield nakowamanqamu wefa Cup. Iyazi ukuthi siyakwazi ukuyehlula.
"Inkinga wukuthi sithwala kanzima ukuyehlulela enkundleni yayo. Nokho ngibona emakhulu amathuba okuguqula isimo ngoba sidlala kahle.
"Kasijabule ngomphumela esiwuthole sibhekene nestoke neliverpool.
“Sidlale kahle nestoke kodwa sashweba amathuba. Ukuhlulwa yiliverpool ngo-4-0 kufane nokushaywa ngolabhabha wempama. Lo mphumela kawuyifanele nhlobo ikilabhu yezinga le-arsenal. Nokho-ke ngiyajabula ngoba sesisishintshile isimo,” kusho lo nozinti.
I-arsenal ithele muva njengembumba ihlula ikoln yasegermany ngo-3-1 kowe-europa League ngolwesine e-england.
Komunye umdlalo wepremiership onamuhla ngesonto, imanchester United izodudulana neEverton ngo-17h00. Kulo mdlalo kubhekwe kakhulu uromelo Lukaku othengwe yired Devils kwi-everton nowyane Rooney ophambane nolukaku njengoba kade kuvulwe iwindi lokuthengwa kwabadlali.
Ired Devils ihlule ibasel yaseSwitzerland ngo-3-0 kowe-uefa Champions League kwathi i-everton yanenebulwa yi-atalanta yaseItaly ngo-3-1 kowe-europa League phakathi nesonto.
Imidlalo yespanish La Liga enamuhla ngesonto ihlelwe kanje:
Deportivo Alaves vs Villarreal 12h00 (SS7).
Girona vs Sevilla 16h15 (SS7). Las Palmas vs Athletic Club 18h30 (SS7).
Real Sociedad vs Real Madrid 20h45 (SS7).
KUSASA NGOMSOMBULUKO
Espanyol vs Celta de Vigo 21h00 (SS7).