Usinde ezembeni UGC
EZOSAZIWAYO: Bathi ubengazifuni izimfundamakhwela
UKUZIPHATHA kwakhe emdlalweni kubikwa ukuthi kumdalele amazinyo abushelelezi ukhaya Dladla, olingisa indawo kagc kuzalo, olukhonjiswa KWISABC 1 ngo-20h30 kusuka ngomsombuluko kuya kulwesihlanu. Kubikwa ukuthi indlela engeyinhle abeseziphethe ngayo kulo mdlalo imenze wacishe wadliwa yizembe.
KUBIKWA ukuthi usinde esezodliwa yizembe umlingisi odumile emdlalweni kamabonakude, olandelwa yizinkumbi zababuleki eningizimu Afrika.
ILANGA Langesonto lipotsho- zelwe yimithombo yalo engaphakathi emdlalweni uzalo, olukhonjiswa KWISABC 1 phakathi nezinsuku, ukuthi ukhaya Dladla, olingisa UGC bese bemchitha aboZalo.
Ngokusho kwalo mthombo, indlela abebezomchitha ngayo UGC wukuqeda indima yakhe ngandlela thile emdlalweni.
Umthombo uthi lo mlingisi usindiswe wukuncengelwa ngabesabc njengoba kwaziwa ukuthi lo mlingisi ungomunye wabathandwayo kulo mdlalo.
“Bebemfuna ehambile abozalo kodwa wavikelwa yisiteshi,” kulanda umthombo.
Lo mthombo uthi obekucika abozalo ngalo mlingisi wukuthi ubesengenwe wumkhuba wokuzikhethela ukuthi yibaphi abadlali afuna ukulingisa nabo.
“Ubefuna abantu abangeke baze behlise umfutho wakhe, efuna umuntu osezingeni elilingana nelakhe ekulingiseni, hhayi imfundamakhwela,” kuqhuba lo mthombo.
Umthombo uthi futhi naye UGC uke wasikaza ukushiya kulo mdlalo ngoba esebona ukuthi abozalo kabasamphethe kahle. Kuthiwa futhi ubenganeme nangeholo lakhe.
Ngaphandle kukagc, kubikwa ukuthi omunye umlingisi oqavile ohlela ukuwulaxaza phansi lo mdlalo, nguthandeka Dawn King ongumangcobo emdlalweni.
Omunye umthombo upotshozele leli phephandaba ukuthi uthandeka usadlala amadayisi, ucabangisisa kahle isinqumo sokushiya.
Umthombo uthi udawn ungumuntu odinga ukuqondwa indlela ayiyo njengoba engumuntu owangenwa yidlozi.
Nokho bobabili laba balingisi bebuzwa yileli phephandaba bathi yonke le mibiko ingamampunge. Ekhuluma NELANGA
Langesonto ukhaya, uthe akazi ukuthi aqhamukaphi amahlebezi okuthi ubefuna ukuhamba.
“Angazi ukuthi abantu bazweni ngami. Mina kade ngagcina emsebenzini, okwamanje ngisaziphumulele,” kusho yena.
Ebuzwa ngamahlebezi okuthi akeneme ngeholo lakhe kulo mdlalo, ucele ukuba kuthintwe okhulumela uzalo ngoba akasazimisele ukukhuluma okungaphezu kwalokhu asekushilo.
Uthandeka Dawn King yena eziphendulela uthe: “Angikahambi kuzalo. Uma kwenzeka ngishiya ngizokwazisa wonke umuntu, kodwa okwamanje ngisathokozile ngokuba yingxenye yalo futhi ngiyabuya kwi- season elandelayo,” kuphetha yena.
Ukoketso Phala okhulumela uzalo, kuze kwashaya isikhathi sokushicilela engazange abuyele entathelini njengokwesethembiso.
Bebemfuna ehambile, usindiswe ngabesabc ngoba bethi uyathandwa.