LUYABUYA UHLELO LWEMISHADO
UKUNGAPHUMELELI kwemishado ohlelweni imarried At First Site, akubathenanga amandla abakhiqizi balo mdlalo njengoba ukhuza ibuya maduze.
Abaningi basakuthatha njengenganekwane okwenzeka kulolu hlelo njengoba kushadiswa abantu abasuke beqala ukubonana ngemuva kokuhlanganiswa ngongoti. Kwisizini yokuqala kushadiswe izithandani eziyisi-6, kodwa azikho ezikhethe ukuqhubeka nomshado ngemuva kwamasonto ayisithupha zindawonye.
Unkk Winnie Kunene ongungoti kwezezimali futhi ongomunye wabasebenza ukuhlanganisa izithandani kulolu hlelo, udalule ukuthi lolu hlelo luhlangabezana nezingqinamba eziningi eningizimu Afrika ngenxa yamasiko nezinkolelo ezahlukene zabantu.
“Nakuba senza konke okusemandleni ethu ukuqinisekisa ukuthi sihlanganisa abantu abazohambisana ngokwezidingo zabo, kodwa kusenzima ngenxa yamasiko nezinkolelo zemindeni.
"Kuningi esikwenzayo kodwa ekugcineni kulele kubona abasuke beshadile ngoba isinqumo sithathwa yibona,” kusho unkk Kunene.
Uthi iningi labantu abangenela lolu hlelo basuke sebekhathele yindlela eyejwayelekile yokuzama ukuthola ophathina bese bezama le ndlela yokushada besebenzisa ongoti.
Urebecca Fuller-cambell oyisikhulu esiphezulu senkampani i-oxyg3n Media eqopha lolu hlelo oluzokhonjiswa kwisiteshi ilifetime (Dstv131), ngomfumfu (October) nonyaka uthe nakuba ungekho umshado ophumelele kwisizini yokuqala kodwa kuyabajabulisa ukuthi abanye kwabebelungenele sebelutholile uthando kwabanye abantu.
“Akusho ukuthi uma imishado yabo ingaphumelelanga sekuphelile ngabo kodwa kusho ukuthi kukhona abakufundayo ngothando nangabo imbala,” echaza.
Wethembise ukuthi abantu bazoyithokozela isizini yesibili yalolu hlelo njengoba kukuningi okuzokwenzeka okuthinta namalobolo imbala.
“Nakuba senza uhlelo kodwa kubalulekile ukuba siwahloniphe namasiko abantu. Mangikucacise ukuthi kasiwakhokhi amalobolo kodwa siyayivumela imindeni iyidingide yodwa bese iphuma nesixazululo,” enaba.
Uma izithandani sezishadile zinikezwa amasonto ayisithupha zithathe isinqumo sokuba ziyaqhubeka nomshado noma ziyahlukanisa.
Uphethe ngokucacisa ukuthi imishado isuke isemthethweni njengoba kusuke kunabameli ababaqwashisayo ngemigomo nemibandela. lucky.cain@ilanganews.co.za
Kasiwakhokhi amalobolo, siyayivumela imindeni iludingide yodwa.