Indlela ibuzwa kwabaphambili
PHAMBILINI kwake kwaba nohlelo esiteshini somsakazo wolimi lwesingisi, isafm, olwalusihloko sithi “Strictly Speaking” lokhu esingakuhumusha ngesizulu sithi “Kahle-hle kuthiwani”.
Lolu hlelo lwalushayelwa ngumnu John Orr, lapho kwakucutshungulwa indlela eyiyo yokusetshenziswa kwamagama athile, enezimenywa ezingongoti bolimi, uprof John van der Westhuizen noprof Roger Lass, ababevela emnyangweni wolimi lwesingisi enyuvesi yasecape Town.
Lihle iqiniso elithi nami ngangifikelwa yisikhwele ngolwethu ulimi, sengathi nakwezethu iziteshi zemisakazo kungaba yinto ekhuthalelwayo lena. Futhi-ke lo mshikashika kumele ungagcini ekusetshenzisweni kolimi kepha nakwezinye nje izimpambosi zempilo, yingakho-ke sithi indlela ibuzwa kwabaphambili.
Singase siqale ngezinto eseziyingxenye yempilo yethu, ezafika nezizwe zasentshonalanga lapho njengoba isaga sisho, kungaba kuhle ukuzwa ngabanikazi ukuthi lezo zinto zenziwa kanjani. Kulezo zinto sikhethe okumbalwa ukuba siphawule ngakho, okuyilokhu:
1. UKUZIPHATHA EKHONSATHINI LENGCWENGA
Njengoba kungeke kwashaya khona ukuzwa ngomlungu ukuthi ibheshu kumbe isidwaba sibhincwa kanjani, kungasisiza ukuba into esiyenzayo uma siyithanda, sibuze ngayo kubanikazi.
Asikuphiki ukuthi kuningi amalungelo enkululeko asesikhulule kukhona kodwa izinto ziba zinhle ngoba zenziwa ngendlela ezaziwa ngayo.
Make senze isibonelo ngokuhambela ikhonsathi lomculo wengcwenga lapho isikhona imisebenzi yabaqambi balo mculo nathi bendlu emnyama esesiyejwayele, njengayo ijuddas Maccabeus nemessiah okuyimisebenzi kageorge Frederich Handel, yicreation kajosef Hydn, yicoronation Mass ka-amadeus Mozart, njalo njalo.
Imigidi enjena kuvamise ukuba ihanjelwe kusihlwa lapho izibukeli zisuke zimbethe ngendlela ethile, nokungaba kuhle ukuba nxa sihambele leyo micimbi, nathi senze njengabanikazi bayo.
Akumsizi umuntu womdabu ukuba eze ekhonsathini elinjalo efake ijezi lekilabhu yebhola angumlandeli walo namhla kungahlangenwe ngomdlalo webhola. Nalapho umculo usuqalile, ukukhuluma, ngisho umbhidi esengenile ukuba kuqale umculo noma sekuculwa, kuyinto ebangela amahloni ngisho kungewena owenza lokho.
Kuvamile-ke ukuba imisebenzi yomculo walolu hlobo ibe mide futhi ibe nezingoma eziningi, okuthi phakathi nesikhathi sekhonsathi kube nekhefu. Abanikazi bale nto ngiye ngibone bengashayi izandla kuze kube yileso sikhathi sekhefu kanjalo nasekupheleni kwekhonsathi. Wo! uzozibona-ke ezakithi. Ihlombe zilishaya ekupheleni kwaleyo naleyo ngoma, okuhamba kuhambe ubone umdlandla wokushaya izandla lezo usuwehla - nokugcina sekuthi gqwa gqwa lapha nalaphaya ukushaywa kwazo kungathi sekugcinwa icala, kanti leso kusuke kungakabi yisikhathi sokuzishaya vele.
Leli yiphutha labaphathi bohlelo, ikakhulukazi abaziyo ukuthi thina ndlu emnyama inkonyane isethuka isisinga kwezinye zalezi zinto, nakuba sekwaphela amakhulu eminyaka zafika kuleli izizwe zasentshonalanga ngenxa yokuthi kade sishiywa ngaphandle uma zenziwa.
2. UKUHLONISHWA KWETAYITELA
Ukubizwa ngodokotela, ngokufunda noma ngokuhlonishwa ngemisebenzi umuntu asuke eyenzile emphakathini, kuyinto yokushayelwa ihlombe. Nakuba kusuke kwethulelwa lowo muntu isigqoko ukuthi dokotela kodwa kusuke kungelona igama lakhe lelo.
Yingakho kuba wukushaya eceleni uma umuntu obizwa ngokuthi dokotela esesayina umbhalo kumbe incwadi afake nokuthi dokotela, kwazise akusilona elinye lamagama akhe lelo.
Ukuthi dokotela kungena ekhelini ngaphandle emvilophini noma ekhelini elingaphakathi nasesibingelelweni ngoba kuyithina esisuke sihlonipha lowo muntu, akusiyena okudingeka azihloniphe kanjalo.
Lokhu ngake ngakubona kwenziwa ngowomdabu owabe esefunde waze wafika kuleli qophelo kodwa kwabonakala ukuthi imnamathele naye le nkinga lapho sesibona esayina bese efaka ekuqaleni itayitela lobudokotela, kube sengathi ababhala ngomshini baphazamile ngokungafaki itayitela lelo.
Sekungikhumbuza enye indaba engake ngayizwa ngomlisa (ngenhlanhla ongesiye owomdabu) owabe eneziqu zobudokotela azithola ngokufunda. Yena-ke wayesayina ngesitembu esiqoshwe nokuthi iziqu lezo wazithola ngezinga eliphezulu (cum laude).
Kuthiwa abanye base bemethe ngelithi ‘ cum laude’ uma bekhuluma ngaye. Kukhona futhi izikhundla zemibutho efana nowamaphoyisa, amasosha, amaphoyisa omnyango wamajele, amaphoyisa omasipala, nawomnyango wezokuthutha, izikhundla zebandla isalvation Army njalo njalo.
Lapha kuyabonakala ukuthi isimo somsebenzi abawenzayo nenhlonipho yakhona idinga khona lokho ukuba umuntu abizwe ngokwesikhundla akusona, kwazise lokho kubuye kuthinte namagunya okuthuma noma ukuyalela obaphethe ukuba benze okuthile.
Sesingasale sesijobelela nokuthi ilungu lombutho elifake umfaniswano akulona icala uma limi phuhle nesigqoko ekhanda phambi kwezikhulu.
Empeleni iyona nhlonipho yakhona leyo ngisho kwenziwa umviliyelo. Phela bona bahlonipha ngokukhipha isifuba nokwenza uphawu lwendesheni ( salute). Ubabona bekhumula izigqoko begebisa amakhanda uma kuhlonishwa ilungu elingasekho.
3. UKWEPHULWA KOLIMI
Asiyiqedele le ndaba ngayo le yokusetshenziswa kolimi lwesizulu, isimo sokwephulwa kwalo esi- lokhu sibhebhetheke njalo okomlilo wequbula.
Asisho khona ukuthi lolu limi malungakhuli kodwa sithi ukukhula kwalo makungasho ukuyekwa kwamagama aziwayo kuthathwe awokwethekela, nokusebenzisa ngendlela engeyona amagama athile.
Nakuba umphakathi uye ukhale ngabemithombo yezindaba nemisakazo ngendlela abalwephula ngayo, nawo kungawusiza ukuba ulalele kwabadala besizukulwane esandulela esawo, bezwe ukuthi kahle hle kukhulunywa kanjani.
Labo bethu abangalukhathaleli ulimi lwethu lwebele, bayazihlupha ngokuqinisekisa ukuthi isilungu sona basikhuluma ngendlela eyiyona.
Make sibheke izibonelo zokusebenzisa kabi ulimi obekungekho sikhula saze saba badala, okuvamise ukuba kuzwakale emibikweni yabacosheli bezindaba bemisakazo nabamaphephandaba ngokufanayo:
ukulwela impilo yakho - esikhundleni sokuthi ubangwa nezibi uma kushiwo ogula kakhulu;
ukwenza ngcono izimpilo zabantu - ukuphila noma impilo iyodwa, noma bebaningi abantu;
ukushisa inyama - esikhundleni sokuthi ukosa inyama. Empeleni uma uyishisa usuke wehluleka wukuyosa;
ukwenzakala - esikhundleni sokuthi ukwenzeka;
izulu liyanetha esikhundleni sokuthi liyana. Yindlu enethayo. Nesisho sithi “indlu yegagu iyanetha”.
ukubamba umhlangano kuyisingisi ngesizulu. Umhlangano uba khona ngoba ubiziwe hhayi ukuthi ubanjiwe;
indabamlonyeni - esikhundleni sokuthi indab’egudwini;
izinja ziyalumana - esikhundleni sokuthi ziyaluma. Phela akunankinga uma zingalumi abantu;
esidlangalaleni - esikhundleni sokuthi esidlangaleni. Ukuthi isidlangalala yisixhosa;
endaweni yasenkandla - esikhundleni sokuthi enkandla. Njengoba inkandla ingaka ngabe lowo usuke esho kuphi nayo: Emabhuqwini, emfongosi, epholela noma ensuze?
Nayo le ndaba yokubiza izinto ngamagama okungesiwona aqondene, iyayidala inyakanyaka. Ake sibuke igama elithi inyanga.
Sekuyinto evamile emibikweni yabezindaba ukuzwa leli gama leyamaniswa nezenzo ezimbi kokunye ezimayelana nokunyamalala nokushuphulwa kwabantu kucwiywe izitho zomzimba ezithile.
Njengoba kwaziwa ukuthi inyanga ngumuntu owusizo emphakathini ngokwelapha abagulayo, kuvele kuxake nje uma abemithombo yezindaba bebika budedengu ngale ndlela lapho nezenzo ezisobala ukuthi ngezobuthakathi uzwe kuthiwa kusolwa inyanga ethile. Inyanga yinyanga, umthakathi ngumthakathi.
Wukushaya eceleni uma obizwa ngodokotela esesayina afake nokuthi dokotela.