Isasasa ngomcimbi kazime wonobubi Kwazulu-natal
KUZOSHIYANA ukwenza nakulo nyaka emncintiswaneni obengundabizekwayo nyakenye wokukhetha uzime wendoda embi kunawo wonke Kwazulu-natal.
Lo mcimbi kubikwa ukuthi uzoba sebit By Bit Nite Club, emtubatuba enyakatho yekwazulu Natal, ngomhla zingama-28 kumfumfu (October).
Nyakenye lo mncintiswano ube nesasasa elikhulu, uhlelo luphethwe ngumufi ujoe “Sgudi Snayisi” Mafela. Umsunguli walo mncintiswano umnu David Ntshangase uthi nonyaka isiteki simi kanje: Owesilisa ozoba nguking Mubi 2017 uzokhala emuke nemali engu- R2 000, ozophuma isibili ahambe no-r800 othathe isithathu uzohamba no-r500. Izethameli zizokhokha ur20.
Ngalolu suku kubikwa ukuthi kuzobe kukhona neminye imincintiswano yokuthokozisa abantu efana nokudliwa kwenkukhu yonke, osheshe wayiqeda awine imali. Abanye bazonikwa amabhodlela kabhiya, kuthi olimbumbuzele lonke kuqala aklonyeliswe. Nabanemikhaba emikhulu kunabanye nabo bayawina.
Umnu Ntshangase ugcizelele ukuthi lona ngumdlalo nje wokukhuthaza abantu ukuba bangazenyezi ngabayikho.
“Umuntu akazemukele njengo- ba enjalo, angazenyezi ngobubi bakhe ngoba kukhona abamthandayo emubi enjalo,” kusho umnu Ntshangase.
Nyakenye lesi sicoco sahlwithwa yiphoyisa likahulumeni usayitsheni Simon Mbuyazi waselokishini Kwamsane, owalala isibili kwaba ngumnu Lucky Mgenge, owesithathu kwaba ngumnu Alfred Jobe.
Lolu hlelo lukazime aluqali ukwenzeka eningizimu Afrika njengoba nasezimbabwe luke lwaqhutshwa kwaze kwasuka umsindo amadoda amabi ebanga isicoco sobubi.
knowledge.simelane@ilanganews. co.za