Bakhangise ngemisebenzi yabo kwi-essence
UBONGA ithuba lokuba yingxenye yombukiso wamabhizinisi oseDurban Exhibition Centre (DEC) enkabeni yetheku, owesilisa obezokhangisa ngomsebenzi wezandla owenziwe ngobuhlalu.
Umnu Thamsanqa Zwane weMangethe Trading Service, ubeyingxenye yabantu abebekhangisa ngemisebenzi yabo emcimbini i-esssence Festival oqale ngolwesihlanu ngengqungquthela yezamabhizinisi, kanti uzosongwa namuhla ngesonto ngedili lomculo.
Ekhuluma NELANGA LangeSonto umnu Zwane, uthi uyaqala ukuba yingxenye yomcimbi omkhulu njenge-essence Festival. Utshele leli phephandaba ukuthi unxenxwe wumasipala wetheku ukuba abe yingxenye yalo mcimbi emuva kokubona umsebenzi wakhe kweminye yemikhangiso yamabhizinisi. “Ngiyajabula ukuba yingxenye yalo mcimbi oseqophelweni eliphezulu ngoba usihlanganisa nabantu bakuleli nabaqhamuka kwamanye amazwe.
"Umsebenzi engiwenzayo udonsa amehlo abantu abaningi ngenxa yobuhle bawo. Lo mcimbi uyasisiza ekubeni kufukuleke amabhizinisi ethu ngoba abantu basuke bephume ngobuningi babo bezobuka imisebenzi yethu. Into engijabulisayo wukuthi abantu kabagcini ngokubuka kuphela kodwa baphinde bathenge izinto ezinhle esizidayisayo. Singosomabhizinisi abasafufusa siyayidinga imicimbi efana nalona ukuze sitshengise amakhono ethu,” kusho yena.
Umnu Sipho Kaunda, ongusihlalo wekomidi lezokuthuthukiswa komnotho nokuhlelwa kweDolobha ethekwini, uthi kwibusiness Fair yilapho abantu besuke bekhangisa ngemisebenzi yabo.
“Abantu abaningi abakhangisa kulo mcimbi ngosomabhizinisi abasafufusa nalaba ababizwa ngemifela ndawonye.
"Osomabhizinisi abakulo mcimbi benza izinto eziningi ezahlukahlukene njengoba kukhona abasebenza ngobuhlalu, abangcwabi nabanye abaningi.
"Lo mbukiso usiza osomabhizinisi ukuba baveze imisebenzi abayenzayo. Kubalulekile ukuba abantu baphume ngobuningi babo bezobuka imisebenzi eyenziwa yilab’ osomabhizinisi,” kusho umnu Kaunda.
phumelela@ilanganews.co.za