ABAWUVALI UMLOMO NGE-DURBAN KOTA
BATHI basizwe yidumela abalithole ezinkundleni zokuxhumana abashiye abantu bencela iminwe befuna impinda ye-durban Kota kwi-essence Festival ethekwini ngolwesihlanu.
Abedurban Kota House, okungabenzi bedurban Kota bathi udumo abaluthole ezinkundleni zokuxhumana yilo oluholele ekutheni bagcine sebeyingxenye yale festivali enkulukazi ezovalwa namuhla.
Le kota ezishaya sa-bunny chow kodwa yona ethakwe ngeburger, ama-fried chip kanye nezinye izibiliboco yenze abantu bayithokozela kakhulu njengoba iphenduke isidlo esehla esiphundu kubantu abebehambele i-essence Festival.
Umasipala wetheku uvulele osomabhizinisi basemalokishini ithuba lokuba balethe amabhizinisi abo kulo mcimbi omkhulu obuwethanyelwe nayizicukuthwane ezivela nasemazweni angaphandle kweningizimu Afrika, kanti kulawo mabhizinisi kukhona nawezindawo zokudla.
Ngesikhathi kuvela leli thuba bagxume bahlala umnu Nkululeko Khumalo, umnu Thokozani Mthethwa kanye nomnu Sakhile Ngcobo abangabasunguli bedurban Kota House, okuyibhizinisi abaliqale ngenyanga eyedlule (August) elisenkabeni yetheku.
“Indlela esiyenza ngayo ikota yethu yiyo eyenze saduma ezinkundleni zokuxhumana. Udurban Tourism ube sewusibiza ukuba nathi sizozibonakalisa kwi-essence Festival.
"Sizimisele ukuba leli bhizinisi lethu likhule kakhulu ukuze sizokwazi nokuvula amathuba emisebenzi entsheni,” kusho umnu Khumalo.
Uqhube wathi ibethusile indlela ethengwe ngayo ikota yabo ngosuku lokuqala lwe-essence Festival. Uthi bayabona ukuthi impela ibhizinisi labo lizodlondlobala.
Uthi kuningi abakufaka kule kota - okubalwa kukho ama-fried chips, russian, ham, bacon, cheese, ribs, burger, kanye nespice sabo esinyimfihlo.
Ezinye izindawo zokudla ebezikhona lapha yimagaba Lounge, Ink Food, 031 Shisanyama nezinye.