EZESIMANJE:
KUYINTO engangabazeki ukuthi isimo somnotho esingesihle sishaya wonke umuntu kungakhathalekile ukuthi ungowaliphi ibala noma ukuliphi izinga lempilo. Lokhu sekuphoqe iningi ukuba liqaphele indlela elisebenzisa ngayo imali. Yize kunjalo kodwa bakhona labo abasayisaphaza noma yikanjani.
Unkk Ncumisa Ndelu usesungule ikhasi enkundleni yezokuxhumana ifacebook elibizwa ngokuthi yi-1 Family 1 Stockpile, ahlose ngalo ukugqugquzela ukuba abantu bonge futhi bathenge izimpahla zasendlini uma kunesidingo. Uthi yize bebaningi abathola usizo kuleli khasi ubonga imfundiso eyatshalwa ngunina ngesikhathi esakhula okuyiyo esithela izithelo manje.
Kuleli khasi kucotshelelwana ngezipesheli zegrosa yasendlini, kusukela ezintweni zokugcoba umzimba, ukudla, okokuhlanza, ikhaya nokunye okuningi. Lokhu kusiza ekubeni ezinyangeni ezilandelayo singabi khona isidingo sokuba uthenge into osuke uyithole esipeshelini.
Isibonelo - uma irayisi libiza ur80 ngokujwayelekile kodwa uma lisesipeshelini bese liba ur60, okusho ukuthi uma uthenga eliwu-4, ezinyangeni ezizayo kasibe sisaba khona isidingo sokuba ulithenge, okusho ukuthi wonge ur20 esikhwameni ngasinye.
Uthi phambilini ubeyilunga lekhasi elithile kwi-facebook labesifazane elikhuluma ngayo yonke into ethinta bona, kodwa ubegcina esekhuluma ngezipesheli ngaso sonke isikhathi, azibone esephambana nokwakusungulelwe lelo khasi.
“Yilapho-ke ngibone khona ukuba ngizisungulele elami ikhasi elizogxila othandweni lokonga. Angizange ngishayisane namuntu kwengangikulo kodwa ngigcine sengibona ukuthi sengiphambana nenhloso yabasunguli balo,” kuchaza yena.
Unkk Ndelu uthi ube esecela kumsunguli walo ukubhala ngekhasi lakhe elisha ukuze labo abanothando lokonga olufana nolwakhe bamlandele.
“Ngikutshela ukuthi siqale singama-40, sanda isibalo saba ngama-200, kuthe kuphela izinyanga ezintathu ikhasi bese linabantu abangaphezu kwe-1000 nokuyinto eyangijabulisa. Ngabona ukuthi kanti abantu bayawuthanda lo msangano wami, ngoba ngangizitshela ukuthi umsangano ngesikhathi ngisaqala,” esho ehleka.
Unkk Ndelu uthi akaziboni emosha imali ngokuthenga okokugqoka okubizayo njengesicathulo esibiza ur3000 asazophinde anyathele ngaso emhlabathini. Kunalokho leyo mali angayisebenzisela ukuba ingane ithole imfundo engcono.
“Kusisizaphi singabantu abamnyama ukujabulela ukubukwa? Ngicabanga ukuthi sekuyisikhathi sokuba sishintshe indlela esicabanga ngayo, nengicabanga ukuthi kungasisiza ekubeni siphile impilo engcono, siphakamisane, singabukelani phansi.
“Mina uma ngikhokha kancane yilapho ngizizwa khona ngithokozile ngoba ngiyonga. Njengomuntu othanda ukuzula, le mali engiyongayo yiyo engigcina ngiyisebenzisela ukuya eholidini nomndeni wami,” kuchaza yena.
Uthi i-1 Family 1 Stockpile okwamanje inabesifazane kuphela ngoba yibo ababhekele kakhulu izinto ezisuke zishoda endlini futhi baluqonda kangcono ulimi lokonga.
Usicebisa ngamasu esingawasebenzisa uma ungumuntu ofisa ukuqala istockpiling ukuze wonge:
Ungayithengi into ngoba nakhu usuyidinga ngoba ugcina ukhokha noma malini edingwa yisitolo.
Hlela ngaphambi kokuyothenga igrosa, ubheke izipesheli.
Ungagxili emikhiqizweni eyaziwayo kuphela. Ukubiza komkhiqizo othile noma ukwaziwa kwawo kakhulu kakusho ukuthi ungcono kodwa kusho ukuthi abakhiqizi bawo bakwazi ukuwumaketha ngendlela ngenxa yokuvunywa yiphakethe.
Bheka iphakethe lakho, ungenzi ngoba ufuna ukubukisa.
Gcina izinto ezithatha isikhathi ukuba zibole noma zidlulelwe yisikhathi.
“Inhloso yami enkulu wukushintsha indlela abantu abacabanga ngayo. Asonge imali ngesikhathi izitolo zithi zizama ukwakha imali ngathi.
“Kungiphatha kabi ukuthi sekuzoze kube nesitolo esesizothengisa ukudla ngesikweletu ngoba nakhu sehluleka wukulawula iphakethe lethu. Abanini bezitolo bayabuka ukuthi siyehluleka wukubhekana nezinto ezibalulekile, sinaka lezo ezingenamsebenzi,” kuchaza yena.
Okubaluleke kakhulu ekuthengeni izimpahla ngamaqoqo uzibeke ( stockpile) wukuba uthenge izinto owazi kahle ukuthi uzisebenzisa njalo. Uthi elinye ikhasi aselisungulile ngelithi 1 Baby 1 Stockpile eliqondene nabesifazane abakhulelwe nabanabantwana ukuze bonge nabo.
“Engikutholile wukuthi kuthatha iminyaka emithathu ukuba amanabukeni adlulelwe yisikhathi ( expiry date) kanti ama- wipe uma engakavulwa angahlala iminyaka emibili,” esho.
Ukulandela leli khasi ngena kwi-facebook ubheke ikhasi elithi 1 Family 1 Stockpile.
tzondi@ilanganews.co.za.