Ukusebenzisana nejalimane kumvulele amathuba
UKUSEBENZISANA nentokazi yasegermany emculweni kamasikandi sekumvulele amathuba amaningi okubonakala emcimbini kamasikandi umzovukile “Jaiva” Khanyeza okulindeleke ukuba abonakale nayo le ntokazi esteji ngomgqibelo kwimvunge Masikandi African Festival ezinkundleni zemidlalo estanger High School, Kwadukuza.
Ujaiva ngumculi othandwayo nohlonishwayo ngokushaya isiginci nangenxa yekhono lakhe elihle emculweni. Nokho ubengavami- sile ukubonakala emicimbini okudidiyelwe kuyo abaculi abaphambili bakamasikandi.
Utshele leli phephandaba ukuthi imicimbi aseyihambile nale ntokazi engukarin Kedem, (le ntokazi) ithakaselwa kakhulu kuyona nakuba abantu bengayizwa ukuthi icula ithini kodwa bathokoziswa wukuyibona esteji nokuthanda kwayo umculo wesintu.
“Abantu bayamthanda kakhulu ukarin nakuba ecula ngolimi lwakubo kule ngoma engimpike kuyona ethi “imfundo ibalulekile” kodwa kuhlanya abantu uma sebembona. Ngithathe isinqumo sokuba ngimbize njengoba kuwumcimbi omkhulu lona ukuze abantu bezobona into yamehlo,” kusho ujaiva.
Ukarin uqale ukubonakala ngombasa (April) kuwona lo nyaka kwinqokotho Masikandi Festival ehamba nojaiva lapho ehlanyise khona izihlwele esekhuluma ngesizulu.
Umhleli walo mcimbi usanelisiwe Bhengu uthi konke sekumi ngomumo ngalo mcimbi othandwa kakhulu kwadukuza. Uthi kulo nyaka likhulu isasasa ngenxa yokuqhudelana kwabalandeli abathi bayobe bephume ngothi lwabo befaniselene nangemifaniswano ngokwehlukana kwamaqembu abo. Kulo mcimbi kuzobe kuboshelwe Amageza Amahle, osaziwayo, Mjikijelwa, Qhoshangokwenzakwakhe, Khuzani, Vumile Mngoma, igcokama Elisha, Majotha, Cevuzile, Mgojeli, Magic Voice, Ubucwebe, Mhawukeleni nabanye abaningi. Esangweni kungenwa ngo-r100 kanti abaphathi bohlelo ngabasakazo bokhozi FM ubeekay Mchunu nonkosinathi Mshengu abasakaza usgiyangengoma.
Mthobisis@ilanganews.co.za