VUKA UZITHINTITHE:
AKUSIZONA zonke izinto okufanele silindele ukuzenzelwa ngunkulunkulu. Akasenzeli izinto esingakwazi ukuba sizenzele zona thina ngokwethu, kanjalo nathi singabantu ngeke sakwazi ukwenza izinto okufanele zenziwe ngunkulunkulu empilweni yethu. Uma ubiza unkulunkulu kufanele wenze isiqiniseko sokuthi awumbizeli into ekufanele ukuba yenziwe nguwena.
Ngamafushane nje, singabantu asifunde ukwazi leli qiniso lokuthi kunezinto unkulunkulu angasoze asenzela zona ngoba kungumsebenzi wethu ukuzenzela zona.
Uma unkulunkulu ekunikeza uphathina noma ake ngithi nje isithandwa sakho, kungumsebenzi wenu phela ukuba nihlele ukuthi niphathana kanjani nesithandwa sakho. Ngisho singathandaza kanjani kodwa unkulunkuku ngeke asiphekele ukhari kodwa uyosinika igrosa futhi unkulunkulu ngeke asenza izitayela emakhanda (hairstyle) kodwa uyosinika izinwele.
Unkulunkulu uyokupha amazinyo kodwa kuyoba kithi singabantu ukuthi amazinyo unkulunkulu asinike wona siyawaxubha yini ukuze abe mhlophe noma siyawayeka yini abe phuzi. Yiqiniso leli okufanele wonke umuntu osothandweni ukuba alazi. Unkulunkulu uyokupha indoda noma akuphe unkosikazi kodwa ukuthi niphathana kanjani kuncike kini.
Bengingasho nje ngingananazi futhi ngingahlonizi ukuthi unkulunkulu angakunika izinsuku eziningi zokuphila kodwa ukuthi uzophila kanjani kuncike kuwena. Singabantu emhlabeni ziningi nje izinto esingagxeka ngazo unkulunkulu, mhlawumbe nje sigcine sesigxeka nosathane kanti cha inkinga ingakuthina.
Ukukhula emhlabeni nokuhlakanipha emhlabeni wukwazi ukuthi izinto eziningi okufanele zenzeke futhi indlela okufanele zenzeke ngayo incike kuwe. Yonke into onayo emhlabeni iyisithunzi sakho.
Uma ugobile nesithunzi sakho sizogoba, ungamoshi isikhathi ngokuzama ukuqondisa isithunzi sakho kanti wena ugobile.
Ngiqonde ukuthi uma kungathiwa umfundisi ufuna ibandla lihleleke kungafanele kuhleleke yena kuqala ngoba ibandla liyisithunzi sakhe.
Uma uthishomkhulu engafuna isikole sakhe siqonde kufanele kuqale kuqonde yena.
Uma ufuna ebudlelwaneni bakho kulunge kufanele kuqale wena ulunge. Ubudlelwano abuyi ngokuthola uphathina oqotho kodwa buya ngokuthi wena uqotho yini ( a relation it is not about finding a right partner but it is about being right).
Ngisho ngoba asimbuki umu-ntu empilweni njengalokhu eyikho kodwa simbuka njengalokhu siyikho.
Ungalokhu ushintsha-shintsha ophathina empilweni kanti umuntu okufanele ashintshe nguwe.
Akulula ukuba usathane abone into enonkulunkulu uma ugqoke izibuko ezingcolile noma ulunguza ngefasitela elingcolile ubona sengathi lento oyibukayo noma le oyilunguzayo ingcolile kanti lutho kungcole ngala kuwena.
Ngeke salibalekela iqiniso lokuthi akusibona bonke abantu esahlukana nabo empilweni ngoba bebheda kodwa hhayi yingoba nakithi ubukhona ugcobho oholele ekwehlukaneni.
Ngesinye isikhathi ukuze uhlale kahle ebudlelwaneni kufanele uzinuke amakhwapha. Akekho umuntu oyomthola emhlabeni ongenasici (perfect, 100%).
Njengoba nawe unesakho isici kufuneka wazi ukuthi nabanye abantu banezabo njengawe ukuthi ucabanga nje wena ukuthi uphelele futhi ugade ukuthi unkulunkulu angakunika umuntu owu 80% bese wena ulokhu ulinyazwa ukuthi awukho lo 20%.
Uma ufuna noma ulindele u-100% kubantu awusoze wawuthola kodwa u-100 uyowuthola kwijuice, amafrijini.