EZOTHANDO:
INDLELA abantu abadalwe ngayo ayifani - kukhona umuntu osheshayo ukuzwela noma ozwela kakhulu, kube khona uhlobo lwabantu olungasheshi ukuzwela.
Kubuhlungu-ke ngesinye isikhathi ukuba ngumuntu osheshayo ukuzwela ebudlelwaneni ngoba kuyenzeka uphatheke kabi ngisho isidingo singekho. Kuthiwa lolu hlobo lwabantu luyaqaphela ngaso sonke isikhathi, lubheka ngisho izinto ezincane ebudlelwaneni, ngesinye isikhathi ezingathi shu.
Imvamisa le nhlobo esheshayo ukuzwela ifuna ukuthi uma ukhuluma nayo ngaso sonke isikhathi uzicwecwe, ungakhulumi noma kanjani ngoba ungathi uyakhuluma kanti usumthinta endaweni engeyinhle. Kulula futhi nokuthi lolu hlobo lwabantu lukhale.
Kubikwa ukuthi lolu hlobo lwabantu luvamisile ukuhlale luzibona luyisisulu cishe sayo yonke into engeyinhle eyenzekayo ebudlelwaneni.
Ngesinye isikhathi uthola ukuthi uphathina wakho ube nosuku olungeluhle emsebenzini, mhlawumbe abuye ekhaya engemnandi - uma ungumuntu ozwelayo uvele uzitshele ukuthi indaba inawe, uzibuze uziphendule ukuthi ngabe wenzeni.
Kuyenzeka uze wehluleke ukuzibamba ubuze ukuthi kanti wenzeni ngoba usuke uzitshela ukuthi mhlawumbe kukhona omcasule ngakho. Ngakolunye uhlangothi, lolu hlobo lwabantu olungasheshi ukuzwela, uma lukubona ukuthi awukho esimeni futhi awuthandi ukukhuluma, kuyenzeka lungakunaki noma lukunike isikhathi uze ubohle.
Yinto eyenzeka cishe kuwo wonke umuntu ukuthi ashayele isinqandamathe sakhe ucingo ngesikhathi esithile kodwa singaluphenduli.
Ukungaphenduli-ke ucingo kunezizathu ezithile - kungenzeka ukuba isinqandamathe sakho simatasa noma asiluzwa. Ngesinye isikhathi akudingi nokuthi ulokhu ushaya uphindelela ngoba uphathina wakho usuke ezobona ukuthi umshayele wangamthola bese ebuyela kuwe.
Le nhlobo-ke ezwelayo kuyenzeka ukuthi ivele idinwe igane unwabu, izitshele ukuthi iyazitsha. Ngesinye isikhathi omunye uze ahluleke wukuzibamba athethise uphathina ethi uziba ucingo noma athi: “ngiyakufonela awulubambi ucingo ulibele ngamadoda noma yizintombi zakho” - uthole ukuthi yinto engekho nje leyo, uphathina akalubambanga ngoba engaluzwanga ngempela noma kade ematasa.
Kubikwa ukuthi kuba nzima ukuthatha izinqumo kulolu hlobo lwabantu oluzwelayo, luvele lusheshe lucabangele uphathina ukuthi uzosemukela kanjani leso sinqumo.
Imvamisa lolu hlobo kuthiwa luthatha lokho okushiwo ngophathina.
Kujwayelekile ukuthi uma ubuza umuntu ukuthi uzodlani uma nifika e- restaurant athi “noma yini” - lowo muntu kungenzeka ukuthi usuke esaba ukuthatha isinqumo, aze asho ngesinye isikhathi ukuthi “ngizodla lokhu okuzodliwa nguwe.”
Umuntu ozwelayo futhi akakuthandisisi ukugxekwa noma ngabe wukugxeka okwakhayo kuyena akuhlali kahle, kuvele kumphule inhliziyo, kumcasule. Uma egxekwa uvele abone sengathi kuliwa naye siqu sakhe.
Laba bantu futhi (abazwelayo) kubikwa ukuthi abasheshi ukudlulisa into - uma uphathina enze into ithile engeyinhle ozwelayo uyibamba isikhathi eside.
Lolu hlobo futhi luvamisile ukukhala njalo. Ngesinye isikhathi lusuke lungafuni ukubonakala lukhala kodwa ngenxa yokuba nenhliziyo ebuthaka luvamise ukwehluleka wukuzibamba. bhekin@ilanganews.co.za *Olunye ulwazi lucashunwe kwiElite Daily