Malubhekisiswe uhlelo lwenkolo ekuseni okhozini FM
KUYATHOKOZISA ukuphawula ngeqhaza lezenkolo emphakathini eningizimu Afrika nokuhlonishwa kwalo wuhulumeni wentando yeningi.
Lokhu kufakazelwa nawukungashabalali kwezinhlelo zezenkolo cishe kuzona zonke iziteshi zemisakazo nezethelevishini. Empeleni ukuba khona kwelungelo lamalayinsense eziteshi zomphakathi, sekwavula ngisho nethuba lokuba kube nalezo ezaziwa ngokuba yiziteshi zamakhristu kuzo lezi zomphakathi.
Singabala nje ezimbalwa KwazuluNatal ezifana nembokodo FM, Highway Radio, Good News Community Radio nezinye ezithe chithi saka ezweni lonke. Kuhle lokhu futhi kuyawuphilisa umphefumulo kwazise isidalwa esingumuntu sehlukile kuzona zonke izilwane ezikhona emhlabeni.
Ngithemeleza kangaka nje ngiqonde kwezinye izinhlelo zalolu hlobo ezizwakala esiteshini ukhozi FM ngoMsombuluko kuya kwelwesihlanu kusempondozankomo ngehora lesi-4 kuya kwelesi-5 olushayelwa ngusiya Mhlongo. Ukwethulwa kwalo nokudidiyelwa kwalo ngezigaba zalo yile nkakha kwenza lube mtoti.
Ngokuvamile lolu hlelo olusihloko sithi “Ulibo Lokuqala”, unjomane uluphetha ngonqambothi lwezintshumayelo ukhozi FM olusuke luziqophe ezindaweni ezahlukene. Nokho-ke muva nje sekubuyiswe isigaba senkonzo sakudala eyayizwakala ngo-9h15 ekuseni.
Ukubuyiswa kwale nkonzo akukubi kodwa ukuyilandelisa ezithendeni zohlelo lukamhlongo (Ulibo Lokuqala) ngikuthola kushaya eceleni ngoba singabalaleli sisuke sisasuthi emoyeni intshumayelo. Le ngxenye yesibili ize iphoqe ukuba ngenxa yesikhathi inqanyulwe lena eyingxenye yohlelo Ulibo Lokuqala kusemnandi, ize iqedelwe ngakusasa.
Okwesibili nalena yesibili kusuke kuseyinkolo yamakhristu - pho kubaluleke ngani ukuba kuhlukaniswe lezi zigatshana esikhundleni sokuqedela okusuke sekuqalile.
Ngabe kungcono ukuba ilandela Ulibo Lokuqala nje, kungoba sekungenye inkolo njengoba lokhu kwenzeka emuva kohlelo “Imvuselelo” nalo oluba kusempondozankomo ngesonto. Lona luye lulandelwe wuhlelo “Izwi Labantu” olugxile enkolweni yesintu.
Lapha asishayeli isiteshi umthetho wokuba siwenze kanjani umsebenzi waso, kodwa kumane kuba ngumuzwa nje umlaleli asala nawo kule ndlela izinto ezimi ngayo okwamanje.
Abaphathi sinxusa ukuba bayicubungulisise indlela okwenzeka ngazo izinhlelo zenkolo kulesi siteshi ikakhulukazi indlela okwenzeka ngayo izinto ohlelweni lwaphakathi nesonto. bonginkosi@ilanganews.co.za
* Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali. Instagram: @zowakha Facebook: Zowakha Mbatha Twitter: @Zowakha zowakha@ilanganews.co.za