ANGIZANGE NGIYISHIYE I-ANCYL: SHENGE
MHLELI, ngibona ngiphoqeleka ukuphawula ngamazwi okuthiwa ashiwo ngumhlonishwa umnu Senzo Mchunu, okade engundunankulu wesifundazawe sethu. Ngifisa ukuthi kucace ukuthi kanginanxa naye futhi ngiyamhlonipha.
Kepha-ke lawa mazwi avele kwikhathuni (cartoon) YELANGA Langesonto lomhla zingama-24 kumandulo (September) okuthiwa ashiwo nguye, ewabhekise kimi, athi; "Ukuba ushenge akashiyanga ngabe lwanqandeka udlame lwe-ifp NE-ANC." Kwamanye amaphepha kuthiwa uthe ukuba angishiyanga I-ANC Youth League. Le nto ifuna ukuqondiswa ngoba nxa ivela ngomlomo womholi ohloniphekile njengomnu Mchunu, ingase ithathwe yintsha nabangaziyo njengeqiniso ibe ingeyilo neze.
Okokuqala mangicacise ukuthi mina angikaze ngifike ekudabukeni kwegoda phakathi kwami neANC ngiseyilunga LE-ANC Youth League. Kuyaziwa ukuthi liqiniso elinobufakazi ukuthi ukuze ngigcine ngingundunankulu (Chief Minister) lokho kwakungumyalezo wenkosi u-albert Luthuli - umengameli-jikelele (President General) kakhongolose nesekela lakhe umnu Oliver Reginald Tambo.
Sekwashiwo ezigcawini eziningi ukuthi babesebenoni egoli bobabili ngenkathi bethumela umnu Cleopas Nsibande, oke waba ngumholi wesikhashana (interim leader) kakhongolose egauteng emuva kowe-1994.
Laba baholi bobabili umnu Nsibande bamthumela kudadewethu ongelamayo umntwana umorgina Phikabesho, owayegane udokotela umafu Dotwana behlala kwelinye ilokishi lasebenoni i-daveyton. Umlayezo womholi U-AJ Luthuli nomnu O R Tambo bathi kumnu Nsibande kathumele umlayezo wabo kimi, owawuthi nxa uhulumeni wobandlululo eze ephoqa isizwe sakwazulu ukuba sibe nohulumeni wesabelo, ngize ngingenqabi ukuhola lowo Hulumeni uma amakhosi ekhetha mina. Besho phela ngoba inhlangano yethu I-ANC yayiphambene nokuqembuqembula izwe libe ngamazwe azimele "geqe". Lokhu umnu Cleopas Nsibande wakuxoxa sisonke kwembulwa itshe ethuneni likamnu O R Tambo, bekhona bonke abaholi abaphezulu umnu Mandela nabo bonke ayeboshwe nabo, nabaholi bonke BE-ANC.
Ngomngcwabo kamnu Nsibande, umhlonishwa ukgalema Motlanthe ngenkathi ebeka inkulumo ngosuku lomngcwabo wathi umnu Cleopas Nsibande waze wemuka emhlabeni eza eluthuli House, ezogqogqa abaholi beANC njalo ngemisombuluko ukuba kube nokubuyisana phakathi kwami NE-ANC njengoba ekudabukeni kwegoda ngowe1980, lapho umnu Alfred Nzo, unobhala-jikelele engigxeka, lapho engibeka njengesitha seANC, sasikade sinomhlangano, ithimba LE-ANC liholwa ngumnu O R Tambo nelenkatha liholwa yimi ehhotela elandani. Ngangingaselona ilu-nga LE-ANC Youth League, ngangi-lilunga leANC elase lineminyaka engama-52. Ngenkathi kushona umholi wethu inkosi Albert Luthuli, ngicelwe yibo abaholi BE-ANC ekudingisweni kanye nom-ndeni wenkosi A J Luthuli ukuba ngibeke inkulumo yomgcwabo egroutville ngasengimdala. Nalapho ngelekelela umama unokukhanya Luthuli (umabhengu) ukulungiselela ukwembulwa kwetshe ethuneni lomyeni wakhe. Nalapho umama Luthuli engicela ukumphelekezela eya emaseru elesotho eyokwemukela indondo, inkosi uluthuli ayeyinikezwa yinhlangano yamazwe ahlangene ase-afrika (i-organisation of African Unity, OAU) engithuma ukuba ngimbongele nomndeni wakwaluthuli nabantu baseningizimu Afrika.
Into edale onke lawa manga yingoba umnu Tambo wayeke wagxekwa ngabayi-8 abahlubuka kwi-anc, beholwa ngumnu Ambrose Makiwane. Ezizathwini abazibekayo ngenkathi behlubuka babeka nesinye isizathu sokuthi bona abakwemukeli ukusondelana kukamnu Tambo nami, njengoba ngingundunankulu wakwazulu ngaphansi kohulumeni bezabelo.
Yingakho-ke nje umnu Tambo wenza isimanga ukuthi ngenkathi intatheli ye-sunday Times ums Suzanne Vos ebika ukuthi umnu Tambo ubenomhlangano nami namathimba E-ANC nenkatha, umnu Tambo wenza into eyasethusa wakhipha isitatimende, ephika-nje ukuthi awukaze ubekhona umhlangano onjalo phakathi kwami naye, kanye namathimba ayesiphelekezela.
Wabe esethi futhi yimi enginikeze lawa maphephandaba ulwazi lokuthi bekukhona umhlangano onjalo, kanti intatheli yacacisa nxa esho njalo ukuthi yona yayinikwe ulwazi ngalo mhlangano ngumnu Cap Zungu owayelinxusa LE-ANC elandani.
Angizukubala-ke mayelana nalolu daba olushiwo ngumnu Mchunu okuningi engingakusho okuwubufakazi bokuthi sasenzani, kuphi, nomnu O R Tambo. Kwaziwa ngisho yilabo ababekhoselise abakithi ababesekudingisweni abanjengomhlonishwa udkt Kenneth Kaunda, nomhlonishwa udkt Julius Nyerere, umhlonishwa umnu Joachim Chissano owayengumengameli wasemozambique nomhlonishwa u-olusegun Obasanjo owayengumengameli wasenigeria.
Uhide lungagcwalisa iphepha lonke lwabaholi bomhlaba abakwaziyo ukusebenzisana kwami nomnu O R Tambo okuze kwagcina ngawo lowo mhlangano owawusehhotela elandani.
Umhlonishwa umnu Nelson Mandela akukaze kugqabuke goda phakathi kwami naye, ngisho nangowe-1989 esezophuma ejele sasibhalelana izincwadi. Ngenkathi engibonga esidlangalaleni kwi-rally yakhe yokuqala ephuma ejele ayayisethekwini, kwezwakala ukuthi baningi abaholi BE-ANC abanxaphayo, abanye bethi kanti "leli khehla linguklova" (inhlamba esasibizwa ngayo ngabanye kwi-anc).
Ngithi kangime-nje lapho ukucacisa ukungabi naqiniso kwamazwi abikwe emaphephandabeni ukuthi mina ngashiya I-ANC Youth League. Sonke lesi sikhathi ngisebenza nomnu O R Tambo ngase ngiyindoda endala eyayingasekhona eminyakeni yamalunga E-ANC Youth League. Abakungabazayo lokhu engikushoyo lapha ngicela bafunde ibhuku elisanda kukhishwa ngunkk Nomzamo Winnie Mandela lapho ekufakazela ukuthunywa kwami YI-ANC ngenkathi ngiba ngundunankulu wakwazulu.
Dkt Mangosuthu Buthelezi Umengameli WE-IFP