Ngenelela Hlanga lomhlabathi
MHLELI, ngithi ake ngiphawule ngengikubona kwenzeka emikhosini yethu yesi Nguni - ngaphansi kwamazulu. Esikhathini esingengakanani kade izintombi ziye emhlangeni. Emhlangeni izintombi zizigqaja ngokuziphatha ngaphansi kwesiko lesizulu. Ngomhla zingama-24 kumandulo (September) bekunomkhosi welembe elaziwa ngokubumba isizwe samaZulu.
La kwelakithi lolu suku seluthathwa njengosuku oluwumgogodla wokuzigqaja kwezinhlanga ezakhele leli lizwe lethu lonkana.
Kuyo yomibili le micimbi sikhuluma ngokuzigqaja ngobuzwe nangemvelaphi yomuntu kuhlanganisa namasiko.
Kuyo yomibili le micimbi ngiqaphela ukuzigqaja okungaphelele okungabangelwa wukungaqondi kahle ngosiko noma ukuziba izinto ezibalulekile ngabomu. Ngizovuma ukuthi okunye esesikubiza ngemvunulo kuwumfakela kodwa esesikuthatha njengento eyithina ngokwamasiko. Kule mvunulo ngizobheka okugqama kakhulu okwenziwa abasimame bakithi.
Iningi labo basuke bengakahlobi ngokwanele uma bengawambozile amakhanda abo ngalokhu abakubiza ngama weave nangaloku abathi ama-human hair.
Yebo sinayo imifakela kodwa le engiyibalula ngasenhla ithatha iphume eceleni kakhulu ngoba isusa umuntu kolunye uhlanga imuse kolunye okungangokuba ucishe udideke impela uma loyo ogqokile ungamkhulumisanga ukuze uthole ubuzwe bakhe.
Kokunye ubabona sebethatha nemvunulo beyigaxa phezu kwayo le nto abayibiza ngezinwele bese ngidideka-ke manje mina uma um- Afrika wase-azania esefana nowase-asia.
Ngaleyo ndlela ngithi makeyingenelele imbube, uhlanga lomhlabathi, kubuyiselwe ukuzigqaja nokuzethemba okuphelele ezinganeni zakithi. Abatshelwe abasimame bakithi ukuthi bahle kakhulu uma bengayifakile le nto abayibiza ngezinwele. Ibaphuca nemvelaphi yabo kanti futhi ibafaka nasezindlekweni nasemncintiswaneni ongenasidingo.
Make zibuyele emasikweni ngokuphelele noma siwayeke ngokuphelele, siyeke ukuba ngamalulwane. Ngaleyo ndlela angiphinde ngimeme indlunkulu Kazulu ukuba ibe sophondweni lokubuyisa ukuzethemba esintwini.
B. Khathi
Ethekwini