I-SUPERSPORT IFUNA UKUHAMBA EZINYATHELWENI ZE-SUNDOWNS
ISUPERSPORT United ilwela ukusika iphethini kwimamelodi Sundowns ngokuba yikilabhu yesibili yaseTshwane ukuba yizingqwele zomqhudelwano ongaphansi kweconfederation of African Football (Caf).
Isupersport izobhekana neclub Africain yasetunisia emdlalweni womlenze wokuqala we- semi-final yecaf Confederation Cup namuhla ngesonto ngo-15h00 elucas Moripe Stadium, e-atteridgeville, etshwane. Lo mdlalo bekumele ugijinywe izolo ngomgqibelo kodwa icaf yayalela isupersport ukuba iwuhlehlisele usuku lwanamuhla.
Uronwen Williams ongunozinti wokuqina wesupersport, utshele leli phephandaba ukuthi badonswe ngendlebe ukungalokothi bavumele izihambi ukuthola igoli kulo mdlalo.
“Umqeqeshi wethu (u-eric Tinkler) usidonse ngendlebe ngaphambi kwalo mdlalo ukuqikelela ukuthi kasizivumeli izitha zethu ukuthola igoli lasekuhambeni ngoba lizosicindezela emlenzeni wesibili. Sizolwela ukushaya igoli kusaqala isiwombe sokuqala ukufaka izitha ngaphansi kwengcindezi.
“Silwela ukuphakamisa ifulegi ledolobha lethu njengoba kwenze isundowns inqoba icaf Champions League nyakenye.
"Okuhle wukuthi amalungiselelo alo mdlalo ahamba kahle kakhulu njengoba engekho umdlali olimele. Sizifunde kahle kakhulu izitha, sizofika kulo mdlalo sizilindele kuzo zonke izingxenye ezimandla kuzona. Sihlele ukuvala ngokuseqophelweni eliphezulu emuva,” kusho uwilliams obuye avimbele neqembu lesizwe lakuleli, ibafana
Bafana.
Komunye umdlalo we- semifinal yeconfederations Cup, ITP Mazembe yaseDemocratic Republic of Congo (DRC) izoshukana NEFUS Rabat yasemorocco emdlalweni onamuhla ngo-15h30 estade TP Mazembe, EDRC.
Imidlalo yemilenze yesibili ihlelelwe ukugijinywa ngolwesihlanu lomhla wama-20 kumfumfu (October) etunisia nasemorocco ngokwahlukana.